سينحروندى جۇزۋدەن وليمپيادا ويىندارىنا ىرىكتەۋ كەزەڭىنىڭ سوڭعى اينالىمى ناۋرىزدان مامىرعا اۋىستىرىلدى. بۇل تۋرالى حالىقارالىق سۋ سپورتى تۇرلەرى فەدەراتسياسى حابارلادى دەپ جازادى Egemen.kz Olympic.kz سايتىنا سىلتەمە جاساپ.
4-7 ناۋرىز ارالىعىندا توكيودا وتەدى دەپ جوسپارلانعان دودانىڭ مامىرعا اۋىستىرىلۋىنا جاپونيادا توتەنشە جاعداي رەجيمىنىڭ ەنگىزىلۋى سەبەپ بولىپ وتىر.
سول سەبەپتى, ۇيىمداستىرۋشىلار ءتۋرنيردى 1-4 مامىرعا شەگەردى.
ايتا كەتەلىك, جاپونياداعى توتەنشە جاعداي رەجيمى 7 اقپانعا دەيىن جالعاسپىق. ەگەر ەلدەگى ەپيدەميولوگيالىق احۋال ناشارلاي تۇسسە, توتەنشە جاعداي رەجيمى تاعى ءبىر ايعا سوزىلۋى مۇمكىن.
سينحروندى جۇزۋدەن قازاقستان كومانداسىندا ءبىر جولداما بار. توكيو وليمپياداسىنا ەكاتەرينا جانە الەكساندرا نەميچتەر سىنعا تۇسەدى.