قاراعاندى مەن جەزقازعان قالالارى اراسىندا قاتىنايتىن جولاۋشىلار پويىزىنا دەگەن جۇرتتىڭ وكپە-نازى كوپ ەدى. نەگە دەسەڭىز, بار-جوعى التى-اق ۆاگونى بار پويىز اراعا كۇن سالىپ قانا جۇرەتىن. مۇنىڭ ءوزى جەزقازعان, ساتباەۆ قالالارى مەن ۇلىتاۋ, اباي, جاڭاارقا جانە شەت اۋداندارىنا قاراستى ستانسالار مەن رازەزدەردىڭ تىعىز شارۋاسى بار تۇرعىندارى ءۇشىن ۇلكەن قولايسىزدىق تۋدىرىپ كەلگەن بولاتىن.
ەندى مىنە, جۇرتتىڭ ءوتىنىش-تىلەگى ەسكەرىلىپ, وبلىس اكىمىنىڭ شەشىمىمەن «قاراعاندى – جەزقازعان» باعىتى بويىنشا پويىز كۇن سايىن جۇرەتىن بولدى. بۇل ماقساتقا جەرگىلىكتى بيۋدجەتتەن قاراجات تا ءبولىندى.
مۇنداي شەشىم تۇرعىندار ءۇشىن وتە ماڭىزدى ەدى. ويتكەنى بۇل قادام حالىقتىڭ تەمىر جول كولىگىنە دەگەن سۇرانىسىن قاناعاتتاندىرىپ, جوعارىدا اتالعان ءوڭىر تۇرعىندارىن جولاۋشىلار قاتىناسىمەن تۇراقتى جانە ساپالى قامتاماسىز ەتۋ ماسەلەسىن تولىق شەشۋگە مۇمكىندىك بەرەدى. مىسالى, بىلتىر وسى ارالىقتا قاتىنايتىن پويىز 100 مىڭ جولاۋشىنى تاسىسا, بيىل بۇل مەجە ەكى ەسەگە دەيىن وسۋگە ءتيىس دەگەن بولجام بار.
«قاراعاندى – جەزقازعان» باعىتى بويىنشا 28 ەلدى مەكەندى باسىپ وتەتىن ەكىنشى پويىزدىڭ دا التى ۆاگونى بار. ونىڭ ەكەۋى كۋپە بولسا, ۇشەۋى پلاتسكارت جانە بىرەۋى جالپى ۆاگون. ونىڭ ءبارى بىلتىر بەلارۋس ەلىندەگى گومەل ۆاگون جوندەۋ زاۋىتىندا كۇردەلى جوندەۋدەن وتكەن ەكەن.
قاراعاندى وبلىسى