ارقالىق قالاسىنىڭ قۇتقارۋشىلارى قۇدىققا قۇلاپ كەتكەن جىلقىنى قۇتقارىپ قالدى. قالانىڭ شەتىندە تەبىندەپ جۇرگەن جانۋار سۋ ىشپەك بولىپ اشىق جاتقان تەرەڭدىگى 2 مەتر قۇدىققا مويىن سوزعاندا تۇياعى تايىپ كەتسە كەرەك.
«23 قاڭتار كۇنى ساعات 15:29-دا ارقالىق قالاسىنىڭ تج بولىمىنە قوڭىراۋ شالعان كەزدەيسوق جولاۋشى جىلۋ ەلەكتر ورتالىعى ماڭىنداعى تەحنيكالىق قۇدىققا جىلقى قۇلاپ كەتكەنىن حابارلادى. قۇتقارۋشىلار وقيعا ورنىنا ساعات 15:36-دا جەتتى. مال يەسى دە قۇدىق باسىندا ءجۇر ەكەن. قۇتقارۋشىلار مەن تۇرعىندار ابدەن السىرەپ قيمىلدان قالعان جىلقىنىڭ موينىنا ارقان لاقتىرىپ, الدىڭعى اياقتارىن وراپ, جانۋاردى قۇدىقتان شىعاردى. ابىروي بولعاندا, جىلقى امان, سۇلق تۇسكەن قالپى ءسال جاتتى دا, كۇش جيناپ العان سوڭ, ۇيىرىنە قاراي كەتتى», دەپ مالىمدەدى وبلىستىق تجد ءباسپاسوز قىزمەتى.
قوستاناي وبلىسى