سقو-دا قىزى اكەسىن توناپ كەتكەن

سقو پد ءباسپاسوز قىزمەتىنىڭ مالىمەتىنشە, پەتروپاۆلداعى ەكىنشى پوليتسيا بولىمىنە وبلىس ورتالىعىنىڭ تۇرعىنى جۇگىنگەن. ول شوتىنان 790 مىڭ تەڭگەنىڭ جوعالعانىن ايتقان. تەرگەۋ بارىسىندا اقشانى ونىڭ كوللەدجدە وقيتىن 19 جاستاعى قىزى ۇرلاعانى انىقتالدى. ال پەتروپاۆلدىڭ ەكىنشى تۇرعىنىنىڭ شوتىنان 449 مىڭ تەڭگە قولدى بولعان. پوليتسەيلەر كۇدىكتىنى انىقتادى. ول – بۇرىن ۇساق ۇرلىق جاساعانى ءۇشىن جاۋاپقا تارتىلعان جابىرلەنۋشىنىڭ 20 جاستاعى وگەي ۇلى بولىپ شىقتى.

ەكى جاعدايدا دا ۇرىلار تۋىستارىنىڭ بانك شوتى قوسىلعان ۇيالى تەلەفونىن پايدالانعان. بۇل فاكتىلەر «ۇرلىق» بابى بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى.

«سوڭعى كەزدە وسىنداي تۋىستار اراسىندا جاسالاتىن ۇرلىق كوبەيىپ بارادى.كوبىنە زاماناۋي تەحنيكانىڭ ءتىلىن بىلمەيتىن ەگدە تارتقان ادامدار زارداپ شەگەدى. سونداي-اق, وسىنداي قىلمىستار Wi-Fi فۋنكتسياسى بار, پارولمەن قورعالماعان تەلەفوندارىن نەمەسە بانك كارتالارىن جوعالتقان كەزدە جاسالادى. ادامداردى تەلەفوندارىنا وزىنەن باسقا ەشكىم بىلمەيتىن پارول قويىپ, ساق بولۋعا شاقىرامىز. بانك كارتالارىنا راستاۋ كودىسىز اقشا شەشۋگە ليميت قويۋ قاجەت, بوتەن ادام جوعالعان كارتامەن ليميتتەن جوعارى تولەم جاساعان كەزدە يەسىنىڭ تەلەفونىنا حابارلاما كەلىپ تۇسەدى جانە يەسى وپەراتسيادان باس تارتا الادى. بانك كارتاسى جوعالعان جاعدايدا قوسىمشا ارقىلى نەمەسە بانككە حابارلاسىپ دەرەۋ بۇعاتتاپ تاستاڭىز», دەيدى پەتروپاۆلداعى ەكىنشى پوليتسيا ءبولىمىنىڭ باستىعى رۋسلان سىزدىقوۆ.

ايتا كەتەيىك, سقو-دا بىلتىر وسى تەكتەس 33 قىلمىس تىركەلگەن ەدى.