اۋىل تۇرعىندارى قازاقستاننىڭ بيوالۋانتۇرلىلىگىن ساقتاۋعا سەپتىگىن تيگىزەتىن كاسىپتى دامىتۋ ءۇشىن نەسيە الادى.
بۇۇ دامۋ باعدارلاماسى ەكولوگيا, گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىمەن جانە اۋىل شارۋاشىلىعىن قارجىلاي قولداۋ قورىمەن بىرلەسىپ, 2020-2024 جىلدارعا ارنالعان «ەكو-دامۋ» نەسيەلەۋ باعدارلاماسىنىڭ ەكىنشى كەزەڭىن ىسكە قوستى.
باعدارلاما ەكوجۇيەلەردىڭ ساقتالۋىنا ىقپال ەتەتىن كاسىپكەرلىكتى باستاۋ نەمەسە ودان ءارى دامىتۋ ءۇشىن ەرەكشە قورعالاتىن تابيعي اۋماقتارعا جاقىن تۇراتىن قازاقستاننىڭ اۋىل تۇرعىندارىن قولداۋعا باعىتتالعان. كاسىپكەرلىكتىڭ بۇل تۇرىنە ەكوتۋريزم, ورمان شارۋاشىلىعى, بالىق اۋلاۋ, اڭشىلىق جانە جايىلىمدىق شارۋاشىلىق, قۇس شارۋاشىلىعى, قويان ءوسىرۋ جانە ارا شارۋاشىلىعى جاتادى. جوبالارى ىرىكتەۋ ولشەمدەرىنە سايكەس كەلەتىن اۋىل كاسىپكەرلەرى 4,5 جىلعا دەيىن جىلدىق كورسەتكىشى 6%-دى قۇرايتىن نەسيە الا الادى, سونىمەن قاتار ءتيىمدى جىلدىق سىياقى مولشەرلەمەسى 6,7%-دان اسپاۋى ءتيىس.
«ەكو-دامۋ» باعدارلاماسىنىڭ ەكىنشى كەزەڭى قازاقستاننىڭ 12 وبلىسىن, 770 اۋىلدىق ەلدى مەكەنىن جانە 28 ەرەكشە قورعالاتىن تابيعي اۋماعىن قامتيدى. باعدارلامانىڭ جالپى بيۋدجەتى 275,3 ملن تەڭگەنى قۇرايدى.
«ەكو-دامۋ» باعدارلاماسى اۋىل تۇرعىندارىنا مال شارۋاشىلىعىن, ومارتا شارۋاشىلىعىن, وسىمدىك شارۋاشىلىعىن, تۋريستىك بيزنەستى دامىتۋعا نەسيە بەرۋ ارقىلى باعدارلامانىڭ ىسكە اسىرىلۋىنىڭ ءبىرىنشى كەزەڭىندە ءوز تيىمدىلىگىن دالەلدەدى. بۇل باستاما ەلىمىزدىڭ بيوالۋانتۇرلىلىگى مەن ەكوجۇيەسىن ساقتاي وتىرىپ, جەرگىلىكتى دامۋدى قولداۋعا, جاڭا جۇمىس ورىندارىن قۇرۋعا تاماشا مۇمكىندىك بەرەدى دەپ سەنەمىز», دەدى بۇۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش.
باعدارلامانىڭ نەگىزگى باسىمدىقتارىنىڭ قاتارىندا گەندەرلىك تەڭدىككە قولداۋ كورسەتۋ جانە ايەلدەردىڭ ەكونوميكالىق مۇمكىندىكتەرىن كەڭەيتۋدى ايتۋعا بولادى. وسىلايشا, باعدارلامانىڭ ءبىرىنشى كەزەڭىندە اۋىلداردا تۇراتىن 30 ايەل ءوز كاسىبىن دامىتۋ ءۇشىن قارجى الىپ ۇلگەردى.
بۇل باعدارلاما بۇۇ دب مەن قوردىڭ بىرلەسكەن ءتورتىنشى باستاماسى بولىپ سانالادى. 2008 جىلدان باستاپ بارلىعى جالپى سوماسى 561,6 ملن تەڭگەنى قۇرايتىن 221 جوبا ىسكە اسىرىلدى, ونىڭ ىشىندە 345 ملن تەڭگەنى بۇۇ دب-عەق گرانتتىق قارجىلاندىرۋدى قۇرايدى. «ەكو-دامۋ» سياقتى باعدارلامالار اۋىل تۇرعىندارىنا وزدەرىنىڭ كىشىگىرىم كاسىپتەرىن اشىپ, دامىتۋعا, سونىمەن قاتار قورشاعان ورتاعا زيان كەلتىرمەستەن جۇمىس ورىندارىن قۇرۋعا مۇمكىندىك بەرەدى», دەدى قور توراعاسى جاندار وماروۆ.