الماتىدا StartDrama تەاتر لابوراتورياسى فارحاد مولداعاليدىڭ رەجيسسەرلىگىمەن OzgeEpic ونەر كەڭىستىگىندە «تۋعان كۇنىڭىزبەن, اناشىم!» اتتى قويىلىم قويدى. سپەكتاكل جاس جازۋشى الىشەر راحاتتىڭ اتتاس پەساسى جەلىسىندە ساحنالانىپ وتىر.
بيىلدان باستاپ StartDrama تەاتر لابوراتورياسىمەن جەتى جاس جازۋشىنىڭ جەتى پەساسىن جەتى جاس رەجيسسەر ساحنالايدى. «تۋعان كۇنىڭمەن, اناشىم!» – سولاردىڭ العاشقىسى.
سۋ جاڭا پەسا بۇگىنگى قوعامداعى وتباسىلىق پروبلەمالاردى قاۋزايدى. قاراپايىم ءارى تراگەديالى تاقىرىپتىڭ ساحناعا كەلۋى تۋراسىندا سپەكتاكل رەجيسسەرى: «قازاق تەاترلارىندا كوبىنە كلاسسيكا قويىلادى. جاس, جاڭا دراماتۋرگتارعا كوڭىل بولىنبەي جاتىر. OzgeEpic سياقتى كىشكەنتاي جەردە ۇلكەن ونەردى ناسيحاتتاپ, ولقىلىقتىڭ ورنىن تولتىرعىمىز كەلەدى. سوندىقتان جالپى ونەرگە جاناشىر كەز كەلگەن ادامعا اشىقپىز», دەيدى.
قويىلىمدا ءبىر-ءبىرىنىڭ تىرشىلىگىنەن مۇلدەم بەيحابار اعايىندى ۇشەۋ اناسىنىڭ تۋعان كۇنىنە جينالادى. قارا شاڭىراقتا ءبارى ءباز باياعى قالپىندا. سوندا دا تۋعان باۋىرلار ءبىرتۇرلى جاتىرقايتىن سياقتى. بالكي, كۇيبەڭ تىرلىك ولاردى ءبىر-بىرىنەن باياعىدا-اق الىستاتىپ جىبەرگەن بولار.
باستى رولدەگى ەرداۋلەتتى اكتەر نۇرجان اسىلحان, ورتانشى ۇل باقداۋلەتتى ەركەبۇلان مۋسين, ال ءۇيدىڭ كەنجەسى سىرىمدى نۇربول قۇمارشا وينايدى. ۇشەۋى دە ءسابيت مۇقانوۆ اتىنداعى سولتۇستىك قازاقستان وبلىستىق قازاق سازدى-دراما تەاترىندا ونەر كورسەتكەن.
اۆتور شىعارماشىلىعىنداعى ءساتتى شىققان العاشقى پەسا «تاۋەلسىزدىك تولعاۋى» بايقاۋىندا وتباسى قۇندىلىقتارىن ناسيحاتتايتىن ۇزدىك ءۇش پەسانىڭ ءبىرى اتانعان. تەاترلاردا زاماناۋي تاقىرىپتاردى قوزعايتىن شىعارمالار از ەكەنىن ەسكەرسەك, اتالعان تۋىندى كورەرمەن قاۋىمدى جاڭا ءبىر كەڭىستىككە الىپ كەلدى. جاڭا درامانى ەلوردا ساحناسىندا كۇتەمىز.