اسقاق ارمانىن الاتاۋعا تاڭعان الماتىلىق جاستاردىڭ الدىنان كەسە-كولدەنەڭدەپ شىعاتىن باس اۋىرتار باستى تاقىرىپ – باسپانا ماسەلەسى. VII شاقىرىلىمداعى ءماسليحاتتىڭ ءبىرىنشى سەسسياسىندا قالا اكىمى باقىتجان ساعىنتاەۆ بيىل «الماتى جاستارى» باعدارلاماسىمەن 1 مىڭ پاتەر بەرىلەتىنىن ايتىپ, تالايلاردىڭ الىستاعى ارمانىن جاقىنداتقانداي بولدى.
سوڭعى جىلدارى جۇيەلى جۇزەگە اسىپ جاتقان وڭتايلى باعدارلامالار جۇمىسشى جاستار ءۇشىن ءۇمىت شامىن جاققانى راس. تىرنەكتەپ تاپقانىڭدى جالدامالى پاتەر يەسىنىڭ قالتاسىنا قۇيعاننان كورى پايىزدىق مولشەرلەمەسى تومەن, ءبىراز جىلدان كەيىن يەلىگىڭدە قالاتىن ءوز ۇيىڭدە ءومىر سۇرگەن كوڭىلگە دە جۇبانىش. الماتى قالاسىندا الەۋمەتتىك سالادا جۇمىس ىستەيتىن كەز كەلگەن جاس ءۇشىن مۇنداي مۇمكىندىكتىڭ قاقپاسىن اشىپ بەرگەن «الماتى جاستارى 3:0» باعدارلاماسى ىسكە قوسىلعان ءبىر جىل ىشىندە مىڭعا تارتا وتباسى قونىس تويىن تويلادى. ب.ساعىنتاەۆ باعدارلاما ارناسىن ودان ارى كەڭىتىپ, 2021 جىلى تاعى دا مىڭداعان وتباسى باسپانا الۋ باقىتىنا كەنەلەتىنىن العا تارتتى. اكىمنىڭ سوزىنشە, وسى باعىتتا اكىمدىك پەن «وتباسى بانك» اق اراسىندا تالقىلاۋ ءجۇرىپ جاتىر.
«بىلتىر بانكپەن بىرىگە وتىرىپ 13 ملرد تەڭگە بولدىك. بۇگىندە قالا ەكونوميكاسىنىڭ ءار سالاسىندا ەڭبەك ەتىپ جاتقان 1 مىڭعا جۋىق جاس وسى باعدارلامامەن پاتەر الدى. بيىل دا وسىنى جالعاستىرامىز. ينفلياتسياعا بايلانىستى نارىقتا پاتەر قىمباتتاپ بارادى. سوعان وراي نەسيە كولەمىن 18 ملرد تەڭگەگە جەتكىزىپ وتىرمىز. بيىل دا 1 مىڭ پاتەر بەرىلەدى. بۇل «نۇرلى جەر», «باقىتتى وتباسى» باعدارلامالارىنان تىس جۇزەگە اسپاق», دەدى قالا باسشىسى.
ەسكە سالساق, «الماتى جاستارى 3:0» باعدارلاماسى 35 جاسقا دەيىنگى الەۋمەتتىك سالا قىزمەتكەرلەرىن قولداۋعا باعىتتالعان. ولاردىڭ ساپىندا – مۇعالىمدەر, دارىگەرلەر, جوو وقىتۋشىلارى, مادەنيەت, سپورت سالاسىنىڭ وكىلدەرى, جۋرناليستەر مەن عالىمدار بار.
تۇتاس ەل كولەمىندەگى ستۋدەنتتەردىڭ تەڭ جارتىسىن قامتيتىن شاھاردا جاتاقحانا جايى دا تۇيىتكىلدى ماسەلەنىڭ ءبىرى. اكىم بۇعان دەيىن 25 جوعارى وقۋ ورنىنىڭ اۋماعىندا 16 مىڭ ورىنعا ارنالعان 38 جاتاقحانا, سونىمەن بىرگە ەكى كوللەدجدە 600 ادامعا شاقتالعان ستۋدەنتتەر ءۇيى سالىناتىنىن تىلگە تيەك ەتكەن. اتالعان جوسپار ويداعىداي جۇزەگە اسار بولسا, ون مىڭداعان شاكىرت باسپانا جالداپ باس قاتىرماس ەدى.
بيىل بولاشاعى ءۇشىن قور جيناسام دەيتىن جاستار ءۇشىن دە اقجولتاي جاڭالىقتىڭ شەتى شىقتى. بۇعان دەيىن قالادا كەڭ ءورىس العان جالعا الۋ باعدارلاماسىمەن 5 مىڭعا تارتا جۇمىسكەر جاس باسپانالى بولۋى بەك مۇمكىن. 8,4 مىڭ كوپ پاتەرلى تۇرعىن ءۇيى بار الماتى ەلدەگى تۇرعىن ءۇي قورى ەڭ باي قالا ەكەنىن اتاپ وتكەن ءجون. دەسە دە كۇن ساناپ اۋماعى ۇلعايعان مەگاپوليستە باسپانا كەزەگى قارقىنداپ ءوسىپ كەلەدى. بۇگىنگى تاڭدا 20 مىڭنان استام ادام تۇرعىن ءۇي كەزەگىندە تۇر.
الماتى