بۇگىن, 12 جەلتوقسان كۇنى ەلىمىزدە 1 مىڭ تەڭگە نومينالىندا جاڭا بانكنوت شىعارىلدى. ول «كۇلتەگىن» تۇركى جازبا ەسكەرتكىشىنە ارنالعان. بۇل تۋرالى Kapital.kz ىسكەرلىك پورتالى حابارلادى.
جاڭا بانكنوت ءتۇسى – قوڭىر-سارى, 134x70 مم كولەمدى قاعازعا باسىلعان. ونىڭ وڭ تۇسىندا «قازاق ەلى» مونۋمەنتى جانە سول جاعىندا تومەندە ۇشىپ بارا جاتقان كەپتەرلەر بەينەلەنگەن. ال ورتاسىنىڭ سول جاق بۇرىشىندا كۇلتەگىن ەسكەرتكىشىنىڭ ءبىر بولىگى تۇر. جوعارعى جاعىنان قازاقستان رەسپۋبليكاسىنىڭ مەملەكەتتىك رامىزدەرى – گەرب پەن جالاۋ ورىن العان. سول جاعىنىڭ جوعارى تۇسىنا نومينال تسيفرلىق تاڭبا مەن ونىڭ استىنا مەملەكەتتىك تىلدەگى ەسكەرتپە جازۋ بەرىلگەن. وندا: «بانكنوتتاردى قولدان جاساۋ زاڭمەن قۋدالانادى», دەپ جازىلعان. سول جاق تىك كولبەۋىنەن نومينالدىڭ مەملەكەتتىك تىلدە ءارىپ تاڭباسىمەن جازىلعان قۇنىن جانە «قازاقستان ۇلتتىق بانكى» دەگەن انىقتاماسىن وقي الاسىزدار.
بانكنوتتىڭ كەلەسى بەتىندە بەينەلەردىڭ باسىم بولىگى كولبەۋ سىزىقتارمەن بەدەرلەنگەن. ول تۇستان تۇركى جاۋىنگەرلەرىنىڭ تاسقا سالىنعان بەينەلەرىن, ارتقى پلاندا تۇركى جازباسىنىڭ ەسكەرتكىشىن كورە الاسىزدار. سول جاق تومەندە جانە وڭ جاق جوعارىدا بانكنوت نومينالىنىڭ تسيفرلىق تاڭبالارى ورىن العان. سول جاقتا ەنى 12 مم گولوگرافيالىق بەلدەۋلەر, وندا مەملەكەتتىك جالاۋدىڭ فراگمەنتتەرى, ۇلتتىق بانك لوگوتيپى مەن «ەسكەرتكىش تەڭگە» دەگەن جازۋ تۇر. ورتا تۇستىڭ جوعارىسىنا «قازاقستان ۇلتتىق بانكى» دەپ جازىلعان. سونىمەن بىرگە, ورىس تىلىندەگى «پوددەلكا بانكنوت پرەسلەدۋەتسيا پو زاكونۋ» دەگەن ەسكەرتپە مەن تومەندە نومينالدىڭ تسيفرلىق تاڭباسى ورىن العان.
ەسكەرتكىش بانكنوتتىڭ تارالىمى-10 ملن. دانا.
دەرەككوز: Kapital.kz