باتىس قازاقستان مەكتەپتەرىندە ءبىلىم بەرۋ فورماتىنا وزگەرىس ەنگىزىلدى

بقو ءبىلىم باسقارماسىنىڭ باسشىسى ايگۇل مىڭباەۆا وڭىرلىك كوممۋنيكاتسيالار قىزمەتى الاڭىنداعى بريفينگىدە ءمالىم ەتكەندەي, قازىرگى كەزدە وبلىستا وقىتۋ شتاتتىق, ارالاس جانە قاشىقتان جۇرگىزىلۋدە.

ونىڭ ايتۋىنشا, وڭىردە 111 132 شاكىرتى بار 379 مەكتەپ جۇمىس ىستەيدى. مەكتەپتەردە سانيتارلىق قاۋىپسىزدىك تالاپتارىن قاتاڭ ساقتاي وتىرىپ, سىنىپتاردا 15 ادامعا دەيىن وتىراتىن, بالالار سانى 300-گە دەيىنگى 256 مەكتەپتە 25881 بالا (23,3 پايىز) - شتاتتىق, 110 مەكتەپتە 85239 بالا (76,7 پايىز) ارالاس رەجيمدە ءبىلىم الۋدا. اتا-انالاردىڭ وتىنىشىنە سايكەس 1 مەكتەپتە 12 بالا (0,01 پايىز) قاشىقتان وقىتىلۋدا. ۆەدومستۆوارالىق كوميسسيانىڭ شەشىمى بويىنشا ءۇشىنشى توقساننان باستاپ 9 جانە 11-ءىنشى (12) سىنىپ وقۋشىلارى ارالاس سيپاتتا ءبىلىم الادى. بۇل سىنىپتاردا ماتەماتيكا, قازاق ءتىلى, ورىس ءتىلى, شەت ءتىلى, فيزيكا, حيميا, بيولوگيا, الگەبرا, گەومەتريا جانە تاريح پاندەرى, ياعني بارلىق ءپاننىڭ 70 پايىزى مەكتەپتە وقىتىلادى.

«مەكتەپتەردە يكەمدى ساباق كەستەلەرى جاسالىپ, ساباقتار اراسىنداعى ۇزىلىستەر ءارتۇرلى سىنىپتار ءۇشىن ءتۇرلى ۋاقىتتا ۇيىمداستىرىلادى. سونداي-اق الەۋمەتتىك قاشىقتىقتى ساقتاۋ ءۇشىن اۋىسىمدار سانى كوبەيتىلىپ, پاندەردىڭ 30 پايىزى قاشىقتان وقىتىلادى. مۇنداي شەشىم اتا-انالار مەن كوپشىلىكتىڭ پىكىرىن ەسكەرە وتىرىپ قابىلداندى», دەدى ايگۇل مىڭباەۆا.

وعان قوسا تۇلەكتەردىڭ وقۋ جىلى سوڭىندا قورىتىندى اتتەستاتتاۋ, ولاردىڭ كوللەدجگە ءتۇسۋ ءۇشىن كەشەندى ەمتيحان, جوو-عا ءتۇسۋ ءۇشىن ۇبت تاپسىراتىنى ەسكەرىلدى. وقۋشىلاردىڭ باعدارلامادان ارتتا قالۋ دەڭگەيىن انىقتاۋ جانە ونى تەڭەستىرۋ ءۇشىن كونسۋلتاتسيالىق ونكۇندىك ۇيىمداستىرۋ جۇمىستارى باستالدى.

اتا-انالار پىكىرىن ەسكەرە وتىرىپ, كەزەكشى سىنىپتاردا ءداستۇرلى سيپاتتا وقۋعا مۇمكىندىگى جوق شاكىرتتەرگە مۇعالىمدەردىڭ قالاۋى بويىنشا جەكە كەڭەس بەرىلەدى. ديرەكتورمەن كەزدەسۋ, پەداگوگيكالىق كەڭەس ءماجىلىسى, اتا-انالار جينالىسى جانە باسقا ءىس-شارالار قاشىقتان وتەدى.

«كاسىپتىك ءبىلىم بويىنشا ايتساق, 1-سەمەستردە وبلىس بويىنشا 1235 ستۋدەنتى بار 8 اۋىلدىق جانە جابىق مەكەمەدە (رۋ) ورنالاسقان كوللەدجدەر شتاتتىق رەجيمدە جۇمىس ىستەدى. ەكىنشى سەمەستردەن باستاپ 25 كوللەدجدەگى 5376 1-كۋرس ستۋدەنتتەرى ارالاس وقۋ فورماتىنا (پاندەردىڭ, مودۋلدەردىڭ 70 پايىزى شتاتتىق, 30 پايىزى قاشىقتان) كوشتى. بۇل كوللەدجدەردەگى 2-4 كۋرس ستۋدەنتتەرى (10342 ادام) قاشىقتان وقۋدى جالعاستىراتىن بولادى. ال وندىرىستىك ماشىقتان شتاتتىق رەجيمدە وتەدى. كوللەدجدەردە وقىتۋعا جانە ماشىقتان وتۋگە وڭىردەگى ەپيدەميالىق جاعدايعا بايلانىستى وزگەرىستەر ەنگىزىلۋى مۇمكىن», دەدى ا.مىڭباەۆا.