قوستاناي وبلىسىندا تۇرعىن ءۇي ساياساتىن ىسكە اسىرۋعا بيۋدجەتتەن 20,4 ملرد تەڭگە ءبولىندى, دەپ حابارلايدى Egemen.kz
بۇل جايىندا وبلىس اكىمى ارحيمەد مۇحامبەتوۆ Instagram پاراقشاسىندا رەسمي مالىمەت تاراتتى.
«بۇگىن قوستاناي وبلىسىندا تۇرعىن ءۇي ساياساتىن ىسكە اسىرۋ بارىسى تۋرالى كەڭەس وتكىزدىم. 2021 جىلى تۇرعىن ءۇيدى ىسكە قوسۋ كورسەتكىشىن 10% ارتتىرۋ مىندەتى تۇر, بۇل دەگەنىمىز - 417,2 مىڭ شارشى مەتر. وبلىستىڭ تۇرعىن ءۇي ساياساتىن ىسكە اسىرۋعا بيۋدجەتتەن 20,4 ملرد تەڭگە ءبولىندى», دەپ جازدى ارحيمەد مۇحامبەتوۆ.
ونىڭ ايتۋىنشا, بيىلعى جىلدىڭ ءبىرىنشى توقسانىندا 93,5 مىڭ شارشى مەتر باسپانانى پايدالانۋعا بەرۋ جوسپارلانعان, ونىڭ ىشىندە كوپقاباتتى تۇرعىن ءۇي – 64,7 مىڭ شارشى مەتر.
كەڭەس بارىسىندا قوستاناي, رۋدنىي قالالارىنىڭ جانە قوستاناي اۋدانىنىڭ اكىمدەرى بيىلعا ارنالعان تۇرعىن ءۇي قۇرىلىسى بويىنشا جوسپارىن باياندادى.
«جيىن قورىتىندىسى بويىنشا تۇرعىن ءۇي قۇرىلىسىنىڭ قارقىنىن تومەندەتپەۋدى, ينجەنەرلىك-كوممۋنيكاتسيالىق ينفراقۇرىلىمدى جەتكىزۋ بويىنشا جۇمىستى جالعاستىرۋدى, سونداي-اق بارلىق جوسپارلانعان نىسانداردى ساپالى جانە مەرزىمىندە اياقتاۋدى تاپسىردىم», دەيدى اكىم.