سۋرەتشى اينالاسىنان سەزىم قىلىن شەرتەتىن نازىك ءيىرىم ىزدەيدى. تىرشىلىككە اراي سىيلاعان اسەم گۇلدەر ونىڭ كەنەبىندە تىپتەن قۇلپىرا تۇسەدى. «راۋشان گ ۇلى», «باقشاداعى كوكتەم», «قاشقارگۇل مەن ءزايتۇن» سەكىلدى تۋىندىلار سۆەتلانا كاكوتكينانىڭ ەڭ تاڭداۋلى جۇمىستارى. ءا.قاستەەۆ اتىنداعى ونەر مۋزەيىندە قىلقالام شەبەرىنىڭ ء«ومىر ءيىرىمى» اتتى كورمەسى اشىلدى.
ونەر جارمەڭكەسىنە سۋرەتشىنىڭ ءارتۇرلى مانەردە ورىندالعان 34 گرافيكالىق جۇمىسى قويىلعان. جىلدار بەدەرىندە قاتتالعان ۇلكەن ىزدەنىستى كورسەتەتىن شىعارماشىلىق بايان ء«ومىر ءيىرىمى» دەپ اتالۋى جايدان-جاي ەمەس. اۆتور ءۇشىن ءومىر ىرعاقتارىن قۇرايتىن كەنەپتەگى سىزىقتار – ءوزىن تولعاندىراتىن كۇيلەر مەن ەموتسيالاردى جازىقتىقتا بەينەلەۋدىڭ نەگىزگى ءتاسىلى. شىعارمالاردىڭ كوركەمدىگىن ارتتىرىپ, كومپوزيتسياسىن اشىپ تۇرعان دا سان تاراۋ سىزىقتار الەمى.
كورمە جەتەكشىسى شولپان نۇعىمانوۆانىڭ ايتۋىنشا, گرافيكالىق تەحنيكاسى ءارتۇرلى بولعانىمەن, سۆەتلانانىڭ سۇيىكتى ماتەريالدارىنىڭ ءبىرى – تۋش, قالامۇش. ونىڭ تۋىندىلارى سىزىقشا, نۇكتە, داق پەن سىزىقتار نەگىزىندە كەنەپكە تۇسەدى. ونەر يەسى كەسكىندەلگەن بەينەلەردى ءوزىنىڭ پلاستيكاسىمەن جانداندىرادى. وسىلايشا ءتۇرلى-تۇستەرمەن تولىقتىرىلعان تىك, دياگونالدى سىزىقتار شىعارماعا جان ءبىتىرىپ, كورەرمەنگە ەرەكشە اسەر سىيلايدى.
– «الماتى اسپانى», «اۋرۋحانا تەرەزەسىنەن» سەكىلدى پەيزاجدىق جۇمىستار مەن «تۇيماداقتار», «راۋشان گ ۇلى» دەپ اتالعان گۇلدەر كومپوزيتسياسىنىڭ توپتاماسى الۋان سەزىمدەر مەن كوڭىل قوبالجۋلارىنىڭ ۇيلەسىمىندەگى تابيعاتتىڭ جارقىن كورىنىسىنە باسا نازار اۋدارادى. سول ارقىلى پەيزاج ليريكاسىنىڭ تەرەڭىنە تارتادى, كورەرمەنىن ءيىرىپ اكەتەدى, – دەيدى شولپان نۇعىمانوۆا.
ءسوز باسىندا ايتىپ وتكەنىمىزدەي, ونىڭ شىعارمالارى نازىكتىكتەن ءنار العان. تۋىندىلاردا كوكتەم كۇنىنىڭ اۋەزدى دىبىستارى پايدا بولادى, دالا گۇلدەرىنىڭ حوش ءيىسى سەزىلەدى, قۇستاردىڭ ءۇنى ەستىلەدى. مۇنىڭ ءبارى البەتتە كورەرمەننىڭ قۋانىش سەزىمىن وياتارى انىق. ال كاكوتكينانىڭ سيۋجەتتىك سۋرەتتەرىنەن ءومىر مەن بولمىس تاقىرىبىنداعى فيلوسوفيالىق تولعانىستار مەن اۆتورلىق پايىمداردى بايقاساق, ليريكالىق مازمۇنداعى شىعارمالارىندا كومپوزيتسيا مەن فورمالاردىڭ ىقشامدىلىق ۇيلەسىمدىلىگى ايقىن كورىنەدى.
سونىمەن قاتار سۆەتلانا كاكوتكينا كوڭىلدىڭ كەيبىر ساتتەرىندە ولەڭ جازادى. ولەڭدەر جيناعىنا يلليۋستراتسيالار جاساۋ سۋرەتشىنى ءا.قاستەەۆ اتىنداعى مەملەكەتتىك ونەر مۋزەيىندە دەبيۋتتىك جەكە كورمەسىن وتكىزۋگە رۋحتاندىرعان. سۋرەتشىنىڭ كوڭىل تەرەزەسىنەن ءومىردىڭ جارقىن بوياۋلارى كورىنىپ, سۇلۋلىق, تازالىقتىڭ جۇپار لەبى ەسەدى.
الماتى