قازاقستانداعى پارلامەنت ءماجىلىسى جانە ءماسليحات دەپۋتاتتارىنىڭ سايلاۋى بارىسىندا ەشقانداي زاڭبۇزۋشىلىق تىركەلگەن جوق. بۇل تۋرالى ءباسپاسوز ءماسليحاتىندا تۇركىتىلدەس مەملەكەتتەر ىنتىماقتاستىعى كەڭەسى حاتشىسىنىڭ ورىنباسارى, سايلاۋ بايقاۋشىلارى دەلەگاتسياسىنىڭ باسشىسى ومەر كوجامان باياندادى.
«قازاقستانداعى ءماجىلىس جانە ءماسليحات دەپۋتاتتارىنىڭ سايلاۋى ۇلتتىق زاڭناماعا جانە حالىقارالىق نورمالارعا سايكەس وتكىزىلدى. سايلاۋ ناتيجەسى قازاقستاننىڭ ودان ءارى قارقىندى دامۋىنا ۇلەس قوسادى دەگەن سەنىمدەمىز. ءبىز وسى سايلاۋدا بايقاۋشى قىزمەتىن اتقارىپ, ءوز ميسسيامىزدى ورىندادىق. سونداي-اق بۇل قۇرامدا وزبەكستان, ازەربايجان, قىرعىز ەلىنىڭ وكىلدەرى دە بار. باقىلاۋشىلىق مىندەت قازاقستاننىڭ زاڭناماسىنا جانە حالىقارالىق ستاندارتتارعا ساي جۇرگىزىلدى جانە اككرەديتتەۋ كامپانياسى بارىسىندا ساياسي پارتيالاردىڭ وكىلدەرىمەن كەزدەستىك», دەدى و.كوجامان. قازاقستاندا سايلاۋ بويىنشا جۇمىستار 253 اۋماقتىق جانە 10 063 ۋچاسكەلىك سايلاۋ كوميسسياسىندا وتكىزىلىپ, 300-دەي ۇمىتكەر مەن 12 ملن سايلاۋشى تىركەلگەن.
حالىقارالىق بايقاۋشىنىڭ ايتۋىنشا, زاڭناماعا سايكەس, سايلاۋدىڭ جالپىلاما وبەكتيۆتى وتۋىنە باقىلاۋ جۇرگىزىلىپتى. سونىمەن بىرگە COVID-19 پاندەمياسى جاعدايى ەسكەرىلە وتىرىپ, سايلاۋ ۋچاسكەلەرىندە سانيتارلىق تالاپتار قاتاڭ ساقتالعان. «ميسسيا باسقا دا حالىقارالىق بايقاۋشىلارمەن ىنتىماقتاسا وتىرىپ, سايلاۋدى قاداعالادى. حالىقتىڭ بارلىق جاستاعى تۇرعىندارى سايلاۋعا قاتىستى, بىرقاتار سايلاۋ ۋچاسكەلەرىندە ەرەكشە قاجەتتىلىگى بار جاندارعا ارنالعان پاندۋستار بولعان جوق. ءبىزدىڭ ويىمىزشا, ول سايلاۋشىلاردىڭ قاتىسۋىنا, داۋىس بەرۋىنە كەدەرگى بولادى. ال جالپى قازاقستاننىڭ ۇيىمداستىرعان سايلاۋى باسقا ەلدەر ءۇشىن ۇلكەن تاجىريبە بولادى دەپ ويلايمىن. تۇركىتىلدەس مەملەكەتتەر ىنتىماقتاستىعى كەڭەسى پارلامەنت ءماجىلىسى مەن ءماسليحات دەپۋتاتتارى سايلاۋى اشىق ترانسپارەنتتى تۇردە جانە ۇلتتىق زاڭناما مەن حالىقارالىق ستاندارتتارعا سايكەس جۇرگىزىلدى دەپ ەسەپتەيدى», دەپ قورىتىندىلادى و.كوجامان.