سەنات دەپۋتاتى دۇيسەنعازى مۋسين شىعىس قازاقستان وبلىسىنىڭ التاي اۋدانىندا بولىپ, «نۇرلى جەر» مەملەكەتتىك باعدارلاماسى اياسىندا پايدالانۋعا بەرىلگەن كوپ بالالى جانە از قامتىلعان وتباسىلارعا ارنالعان تۇرعىن ۇيلەردىڭ ساپاسىمەن تانىستى جانە جاڭا قونىستانۋشىلارمەن كەزدەستى, دەپ حابارلايدى Egemen.kz
سەناتور وبلىستىق اۋرۋحانادا بولىپ, ينسۋلت ورتالىعىن, كارديولوگيالىق بولىمدەگى انگيوگرافيالىق بولىمشەنى ارالادى جانە كۆي-اۋرۋحاناسىندا بولىپ, دەنساۋلىق ساقتاۋ سالاسىنداعى جاعدايمەن تانىستى. ول اۋداننىڭ مەديتسينالىق مەكەمەلەرىنىڭ زاماناۋي جابدىقتارىن باعالادى جانە اۋداننان شىقپاي ساپالى مەديتسينالىق كومەك ءالۋدىى مۇمكىندىگىن اتاپ ءوتتى.
«جالپى, شىعىس قازاقستان وبلىسىندا زاماناۋي مەديتسينانى دامىتۋعا ۇلكەن كوڭىل بولىنەدى, مەديتسينالىق جابدىقتارمەن جابدىقتاۋعا, مەديتسينالىق كادرلاردى دايارلاۋعا جانە مامانداردى قايتا دايارلاۋعا قوسىمشا 20 ميلليارد تەڭگە ءبولىندى. زاماناۋي جابدىقتاردىڭ بولۋى جانە ءسىزدىڭ اۋداننىڭ دەنساۋلىق ساقتاۋ سالاسىنا ءتيىمدى ينۆەستيتسيالار جوعارى باعاعا لايىق», دەدى دۇيسەنعازى مۋسين.
كەزدەسۋ بارىسىندا دارىگەرلەر مەديتسينالىق كادرلاردىڭ, ونىڭ ىشىندە رەانيماتولوگتاردىڭ جەتىسپەۋشىلىگى تۋرالى ايتتى. سەناتور بۇل ماسەلەنى جۇيەلى تۇردە شەشۋ قاجەتتىگىن اتاپ ءوتتى جانە وسى باعىتتاعى جۇمىستاردى رەسپۋبليكالىق دەڭگەيدە جالعاستىرۋعا ۋادە بەردى.