ەلىمىزدىڭ بارلىق وڭىرىندە سايلاۋ ۋچاسكەلەرى جابىلدى

قر ورتالىق سايلاۋ كوميسسياسىنىڭ دەرەگىنشە, استانا ۋاقىتىمەن ساعات 20-00-دە ەلىمىزدىڭ 12 وڭىرىندە, ال ساعات 21-00-دە 5 وڭىردە سايلاۋ ۋچاسكەلەرى جابىلدى. وسىلايشا, كەزەكتى سايلاۋ ناۋقانىنا وراي اشىلعان 12 وڭىردەگى 8 141, 5 وڭىردەگى 1 853 سايلاۋ ۋچاسكەسى جۇمىسىن اياقتادى.

سونىمەن قاتار قازاقستاننىڭ 53 شەت مەملەكەتتەگى وكىلدىكتەرى جانىنان اشىلعان 66 سايلاۋ ۋچاسكەسىنىڭ 10-ىندا سايلاۋشىلار ءوز داۋىستارىن بەرىپ بولدى. قازىرگى ۋاقىتتا ۋاقىت بەلدەۋىنە بايلانىستى قالعان ەلدەردە داۋىس بەرۋ جالعاسىپ جاتىر.

11 قاڭتار كۇنى نۇر-سۇلتان ۋاقىتىمەن تاڭعى ساعات 07:00-دە امەريكا قۇراما شتاتتارى مەن كاناداداعى قازاقستان ازاماتتارى داۋىس بەرۋدى اياقتايتىن بولادى.

ايتا كەتەرلىگى, وبلىستاردىڭ, رەسپۋبليكالىق ماڭىزى بار قالالاردىڭ, استانانىڭ سايلاۋ كوميسسيالارى ۇسىنعان مالىمەتتەرگە سايكەس, ساعات 20-00-دەگى جاعداي بويىنشا سايلاۋ بيۋللەتەندەرىن تىزىمگە ەنگىزىلگەن سايلاۋشىلاردىڭ جالپى سانىنىڭ 63,1 پايىزى الدى.