ۇلەسكەرلەر «جاعالاۋ-3» تۇرعىن ءۇي كەشەنى, 30-بلوكتىڭ قۇرىلىسىن سەگىز جىل كۇتتى, دەپ حابارلايدى Egemen.kz اكىمدىكتىڭ رەسمي سايتىنا سىلتەمە جاساپ.
بۇل تۇرعىن ءۇي كەشەنىنە جاڭا جىل قارساڭىندا 600-دەن استام وتباسى قونىستاندى. ەلوردا اكىمدىگى جۇمىستىڭ ناتيجەلى اياقتالۋى ءۇشىن ۇيىمداستىرۋشىلىق, قۇقىقتىق جانە ينجەنەرلىك سيپاتتاعى كوپتەگەن قيىندىقتاردى شەشتى: ءۇيدىڭ قاسبەتىنىڭ جۇمىسى, قاجەتتى ينفراقۇرىلىمدى جۇرگىزۋ (سۋمەن جابدىقتاۋ, جىلىتۋ, كارىز, ەلەكتر جۇيەسى), كىرەبەرىستەردىڭ ىشكى ارلەۋى, ليفت ورناتۋ, قۇجاتتاردىڭ تولىق تىزبەسىن قالپىنا كەلتىرۋ, اباتتاندىرۋ جانە ت.ب.
تۇرعىنداردىڭ ايتۋىنشا, قازىرگى ۋاقىتتا ءۇيدى پايدالانۋعا قاتىستى تەحنيكالىق جانە قۇقىقتىق قيىندىقتاردىڭ ءبارى شەشىلدى.
«بىزگە كومەك قولىن سوزعان مەملەكەتكە العىسىمىز شەكسىز. بيلىكتىڭ قولداۋىنىڭ ارقاسىندا قازىر تولىققاندى ءومىر ءسۇرىپ جاتىرمىز. بۇگىنگە دەيىنگى قۇرىلىستىڭ اياقتالۋىنا قاتىستى سەنىمسىزدىك, ۇمىتپەن قاراۋ, قينالعانىمىز, ءبارى ارتتا قالدى. جاڭا جىل قارساڭىندا جىلى, جايلى پاتەرلەرگە كوشىپ, ءومىرىمىزدى تازا پاراقتان باستاعانداي بولدىق», — دەيدى «جاعالاۋ-3» تك, 30-بلوك تۇرعىنى مەرۋەرت سەرىكباەۆا.
ەستەرىڭىزگە سالا كەتەيىك, جاڭا جىل قارساڭىندا قالانىڭ باستى ۇزاق قۇرىلىستارىنىڭ ءبىرى اياقتالىپ, تۇرعىندار قونىس تويىن تويلادى. «جاعالاۋ-3» تك, 30-بلوگىنىڭ قۇرىلىسى سەگىز جىلعا سوزىلدى.