قازاقستان احقو الاڭى ارقىلى اقش-پەن ينۆەستيتسيالىق ىنتىماقتاستىقتى ارتتىرادى

تاراپتار اوك, تۋريزم, لوگيستيكا, ينفراقۇرىلىم, سونداي-اق قارجى جانە تەحنولوگيالار سالالارىنداعى ينۆەستيتسيالىق ىنتىماقتاستىقتى دامىتۋ پەرسپەكتيۆالارىن تالقىلادى. بۇل رەتتە قازاقستان رەسپۋبليكاسى ەكونوميكاسىنىڭ جەكە سەكتورىن دامىتۋعا باعىتتالعان جوبالار مەن باستامالاردى ءبىرىنشى كەزەكتە ىسكە اسىرۋ قاجەت ەكەنى اتاپ ءوتىلدى.

كەلىسسوز قورىتىندىسى بويىنشا «استانا» حالىقارالىق قارجى ورتالىعىنىڭ اكىمشىلىگى» اق مەن اقش حالىقارالىق دامۋ قارجى كورپوراتسياسى اراسىندا ينۆەستيتسيالىق ىنتىماقتاستىق تۋرالى كەلىسىمگە قول قويىلدى.

قۇجات قازاقستان رەسپۋبليكاسىندا $1 ملرد دەيىنگى سوماعا احقو پلاتفورماسى ارقىلى بىرلەسكەن ينۆەستيتسيالىق جوبالاردى ىسكە اسىرۋدى كوزدەيدى.

اقش-تىڭ حالىقارالىق دامۋ قارجى كورپوراتسياسى امەريكا قۇراما شتاتتارىنىڭ دامۋ ينستيتۋتى, ول شەتەلدە جەكە جوبالاردى قارجىلاندىرۋدى قامتاماسىز ەتۋگە جانە قولداۋعا جاۋاپتى. DFC 2019 جىلعى 20 جەلتوقساندا شەتەلدىك جەكە ينۆەستيتسيالار كورپوراتسياسىنىڭ (OPIC) اقش-تىڭ حالىقارالىق دامۋ اگەنتتىگىنىڭ (USAID) دامۋدى نەسيەلەندىرۋ باسقارماسىمەن بىرىگۋى ارقىلى قۇرىلدى.

كەلىسسوزگە قازاقستان تاراپىنان قر پرەمەر-ءمينيسترىنىڭ ءبىرىنشى ورىنباسارى ءاليحان سمايىلوۆ, قر ستراتەگيالىق جوسپارلاۋ جانە رەفورمالار جونىندەگى اگەنتتىگىنىڭ توراعاسى – احقو باسقارۋشىسى قايرات كەلىمبەتوۆ, سىرتقى ىستەر ءمينيسترى مۇحتار تىلەۋبەردى, امەريكا تاراپىنان — اقش-تىڭ قازاقستانداعى ەلشىسى ۋيليام موزەر, DFC باس اتقارۋشى ديرەكتورىنىڭ كەڭەسشىسى كالەب ماككارري, DFC باسقارۋشى ديرەكتورى الليسون ماينور قاتىستى.