ايماق باسشىسى پوليتسيا دەپارتامەنتىندە ءتارتىپ ساقشىلارى جانە ۇلتتىق ۇلان ساربازدارىمەن جولىقتى, دەپ حابارلايدى Egemen.kz Polisia.kz سايتىنا سىلتەمە جاساپ.
ارنايى وتكىزىلگەن كەڭەستە وبلىستىق دەپارتامەنت باستىعى جانات سۇلەيمەنوۆ وڭىردەگى كريمينوگەندىك جاعداي تۋرالى ايتىپ بەردى. ونىڭ سوزىنشە, ايماقتاعى احۋال تۇراقتى. قىلمىس دەڭگەيى وتكەن جىلى 30 پايىزعا تومەندەپتى. مەملەكەتتىڭ قولداۋى ارقاسىندا جىل سايىن ماتەريالدىق-تەحنيكالىق قامتۋ كورسەتكىشى ءوسىپ كەلەتىنىن اتاپ ءوتتى.
پوليتسەيلەردى جاڭا جىلمەن قۇتتىقتاي كەلە بەردىبەك ساپارباەۆ ءتارتىپ ساقشىلارىنىڭ كۇن دەمەي, ءتۇن دەمەي اتقارعان جۇمىستارى ءۇشىن العىس ءبىلدىردى.
– وتكەن جىلدىڭ كۇردەلى, قيىن بولعانىن بىلەسىزدەر. سىزدەردىڭ قوعامدىق قاۋىپسىزدىكتى قامتاماسىز ەتۋدە ورىندارىڭىز بولەك. ەگەر قاۋىپسىزدىك پەن تىنىشتىق بولماسا, ەلدىڭ اراسىندا ىنتىماق پەن دوستىق, تۇراقتىلىق بولمايدى. ەلدىڭ دامۋى ەڭ ءبىرىنشى كەزەكتە تۇراقتىلىققا بايلانىستى, – دەپ اتاپ ءوتتى وبلىس اكىمى.كەڭەستەن سوڭ ايماق باسشىسىنا جەدەل باسقارۋ ورتالىعى كورسەتىلدى. بۇل جەردە تاراز كوشەلەرىندەگى جاعداي سوڭعى ۇلگىدەگى 208 كامەرانىڭ كومەگىمەن باقىلانىپ, تۇرعىنداردىڭ تەلەفون ارقىلى ايتىلعان شاعىمدارى قابىلدانادى. قىزمەتكەرلەردىڭ سوزىنشە مۇندا كۇنىنە 500-گە جۋىق قوڭىراۋ شالىنادى ەكەن. جەدەل باسقارۋ ورتالىعىنىڭ كومەگىمەن قوعامدىق ورىنداردا جاسالاتىن قىلمىستاردىڭ 70 پايىزى ءىزى سۋىماي اشىلادى.
بەردىبەك ساپارباەۆ وبلىستىق پوليتسيا دەپارتامەنتىنىڭ مۇراجايىنا دا باردى. مۇندا قىزمەت بابىندا قولدانىلاتىن كولىكتەردىڭ, قىزمەتتىك كيىمدەردىڭ بۇرىنعى ۇلگىلەرى ساقتالعان. ەكسپوناتتارمەن تانىسىپ بولعان سوڭ بەردىبەك ساپارباەۆقا 10 جىل بۇرىن بولعان لاڭكەستىك ارەكەت تۋرالى فيلم كورسەتىلدى.