پاندەميا باستالعالى ۆيرتۋالدى تۇردە جۇمىس ىستەيتىن كاسىپكەرلەردىڭ قاتارى كوبەيە ءتۇستى. مۇنىڭ سىرتىندا, قوعامدىق تاماقتانۋ نىساندارىنىڭ كوبى Whats App جانە Instagram ارقىلى بەلسەندى ساۋدا جۇرگىزە باستادى. ساراپشى ماماندار ەلەكتروندى ساۋدانىڭ ءالى دە جالعاسا بەرەتىنىن ايتادى.
بيىل قوستاناي وبلىسىندا جالپى قۇنى 11,5 ملن تەڭگە بولاتىن 69 تسيفرلى جوبا جۇزەگە اسىرىلدى. ماسەلەن, «بايان سۇلۋ» فابريكاسىندا ۆافەلدى كامپيتتەر مەن شوكولادتى باتوندار شىعاراتىن اۆتوماتتاندىرىلعان وندىرىستىك جەلى ىسكە قوسىلدى. ال «جاس قانات 2006» قۇس فابريكاسى جەم دايىندايتىن جانە جۇمىرتقا تاسيتىن قۇرىلعىلارىن جاڭعىرتتى.
اقپاراتتاندىرۋ باسقارماسى باسشىسىنىڭ ايتۋىنشا, ايماقتا سوزىلىپ بارا جاتقان پاندەمياعا بايلانىستى شاعىن جانە ورتا بيزنەستىڭ دە ەلەكتروندى ساۋداعا جۇگىنۋى جيىلەگەن.
«وبلىستىق اكىمدىك قازىر فۋلفيلمەنت ورتالىعىن ىسكە قوسۋدى قاراستىرىپ جاتىر. بۇل ورتالىق ىسكە قوسىلسا, پوشتالىق جونەلتىلىمدەردىڭ كولەمى ارتىپ, تاۋارلاردى جەتكىزۋ مەرزىمى قىسقارادى. بيىل «قازپوشتانىڭ» وبلىستىق فيليالى فرانچايزينگ نۇكتەلەرىنىڭ ەسەبىنەن 25 قوسىمشا بولىمشە اشتى. ەلەكتروندى ساۋدانى دامىتۋ بويىنشا ونلاين باقىلاۋ-كاسسالىق ماشينالارىن ەنگىزۋ جۇمىستارى ءجۇرىپ جاتىر. بۇگىندە 35 مىڭ كاسسالىق ماشينا ونلاين رەجىمدە جۇمىس ىستەيدى», دەدى وبلىستىق اقپاراتتاندىرۋ, مەملەكەتتىك قىزمەت كورسەتۋ جانە ارحيۆ باسقارماسىنىڭ باسشىسى ازامات قاشيەۆ.
مۇنىڭ سىرتىندا, بۇگىندە قوستاناي وبلىسىندا ۆيرتۋالدى تۇردە جۇمىس ىستەپ جاتقان 167 بيزنەس نىسانى تىركەلگەن.
قوستاناي وبلىسى