ماعزۇم مىرزاعاليەۆ: ەكولوگيالىق ءتۋريزمدى دامىتۋ قاجەت

«تۋريزمدەگى وركەنيەتسىز كوزقاراس ءبىزدىڭ تابيعاتىمىزعا, بىرەگەي تابيعي وبەكتىلەرىمىزگە كەرى ىقپالىن تيگىزەدى. بارلىعىمىز بۇعان سان رەت كوز جەتكىزدىك. سوندىقتان ەكولوگيالىق, ۇيىمداستىرىلعان ءتۋريزمدى دامىتۋ قاجەت. ال قازاقستاندا ەكوتۋريزمنىڭ الەۋەتى زور. مەملەكەت باسشىسى ەل ىشىندەگى ەكولوگيالىق تۋريزم مادەنيەتىن بەلسەندى دامىتۋدىڭ ماڭىزدىلىعىن اتاپ ءوتتى. جۇمىس باستالىپ تا كەتتى», دەدى مينيستر.

ونىڭ ايتۋىنشا, قازىرگى ۋاقىتتا قازاقستاندا ون ءۇش ۇلتتىق پارك بار. 2019 جىلى كەلۋشىلەر سانى 1,5 ملن ادام بولدى.

«بۇگىنگى كۇنى ۇلتتىق پاركتەردە كولىك ءۇشىن جابدىقتالعان تۇراقتار, كەمپينگتەر, جاڭا سانيتارلىق كابينالار مۇلدەم جەتكىلىكسىز. ءبىز حالىقارالىق تاجىريبەنى ەسەپكە الا وتىرىپ, نەگىزگى نازار مارشرۋتتار مەن سوقپاقتاردى دامىتۋعا جانە جابدىقتاۋعا اۋدارىلاتىن بولادى. زاماناۋي ۆيزيت-ورتالىقتار, مەديتسينالىق پۋنكتتەر, كەمپينگتەر, ەتنو-اۋىلدار جانە ت.ب. قۇرۋ كوزدەلىپ وتىر», دەدى ول.

ءمينيسترى وسىعان بايلانىستى ءتيىستى ماستەر-جوسپارلار ازىرلەنىپ جاتقانىن ءسوز ەتتى.

«قابىلداناتىن شەشىمدەردىڭ اشىقتىعىن قامتاماسىز ەتۋ ماقساتىندا ۇلتتىق پاركتەر جانىندا قوعامدىق كەڭەستەر قۇرىلدى. الماتى توبىنىڭ ۇلتتىق پاركتەرىندە: ىلە الاتاۋى, شارىن,  «التىن ەمەل» جانە «كولساي كولدەرىندە» ەكوتۋريزمدى دامىتۋ كونتسەپتسيالارى ازىرلەنىپ, ولاردىڭ پرەزەنتاتسيالارى وتكىزىلدى», دەدى م. مىرزاعاليەۆ.

بۇدان باسقا, ول قالعان بارلىق ۇلتتىق پاركتەردە ەكوتۋريزمدى دامىتۋ بويىنشا ءتيىستى كونتسەپتسيالار ازىرلەنىپ جاتقانىن ايتتى.

«مينيسترلىك بىرىككەن ۇلتتار ۇيىمىنىڭ دامۋ باعدارلاماسىمەن بىرلەسىپ ەرەكشە قورعالاتىن تابيعي اۋماقتاردىڭ تۋريستىك مارشرۋتتارعا جانە ەكولوگيالىق جولدارعا رەكرەاتسيالىق جۇكتەمەنى انىقتاۋ جونىندە ادىستەمەلىك ۇسىنىمدار ازىرلەپ جاتىر. جالپى العاندا, ەرەكشە قورعالاتىن تابيعي اۋماقتاردا ەكولوگيالىق ءتۋريزمنىڭ دامۋى, ەڭ باستىسى, ەل ازاماتتارىنىڭ تابيعاتتى قورعاۋعا, تۋريستتەرگە قاۋىپسىز جانە قولايلى جاعداي جاساۋعا, جەرگىلىكتى تۇرعىنداردى قىزمەت كورسەتۋ سالاسىنداعى جاڭا جۇمىس ورىندارىمەن قامتاماسىز ەتۋگە اكەلەدى», دەدى ول.