بىلتىر تاۋەلسىزدىك كۇنى قارساڭىندا ءبىلىم بەرۋ سالاسىنىڭ قىزمەتكەرلەرىنە پاتەر كىلتتەرى تاپسىرىلدى. ءبىلىم بەرۋ سالاسىندا 18 جىلدىق تاجىريبەسى بار وقىتۋشى, كوپ بالالى انا لاۋرا وتەپبەرگەنوۆا نۇر-سۇلتان قالاسىنداعى جاڭا پاتەردىڭ يەسى اتاندى.
«مۇعالىمدەر مەن وقىتۋشىلاردى ۇمىتپاعاندارى ءۇشىن ۇلكەن راحمەت ايتامىن. ءبىز بۇل كۇندى اسىعا كۇتتىك. پاتەر وتە جىلى, ىڭعايلى», دەدى وقىتۋشى لاۋرا وتەپبەرگەنوۆا.
ءۇش بالانىڭ اناسى باعيلا ىدىرىسوۆا دا ەلورداداعى جاڭا پاتەردىڭ كىلتىن الدى. ول پاتەردىڭ كىلتىن تاپسىراتىنى تۋرالى حابار العان كەزدە قاتتى قۋانعانىن جاسىرمادى. «تۇرعىن ءۇي كەزەگىندە تۇردىق. بۇكىل وتباسىمىزبەن وتە قۋانىشتىمىز. ماعان: «كەلىپ, پاتەردى تاڭداپ الىڭىز», دەپ حابارلاعاندا, باقىتتان جىلاپ جىبەردىم. قازىر ءبىزدىڭ پاتەرىمىز بار ەكەنىنە وتە قۋانىشتىمىن», دەپ اعىنان جارىلدى پەداگوگ باعيلا ىدىرىسوۆا.
پەداگوگتەر تۇرعىن ءۇيدى «نۇرلى جەر» مەملەكەتتىك باعدارلاماسى اياسىندا جانە ءبىلىم جانە عىلىم مينيسترلىگى مەن «قازاقستان يپوتەكالىق كومپانياسى» اق اراسىنداعى مەموراندۋم شەڭبەرىندە الدى.
«جىل سوڭىندا, ەلىمىزدىڭ ەڭ باستى مەرەكەسى – قازاقستان رەسپۋبليكاسىنىڭ تاۋەلسىزدىك كۇنى ءبىزدىڭ ارىپتەس-پەداگوگتەرىمىز جاڭا پاتەردىڭ كىلتتەرىن الدى. اقتوبە, اقتاۋ, الماتى, قاراعاندى قالالارىندا دا شامامەن 200-دەن استام پەداگوگ جاڭا پاتەرگە يە بولدى. ءبىز ارىپتەستەرىمىزدىڭ وسى مەرەكە قارساڭىندا جاڭا پاتەرگە ورنالاسقانىنا وتە قۋانىشتىمىز. ارينە ەندى ءبىزدىڭ ارىپتەستەرىمىز تۇرعىن ءۇي ماسەلەلەرىنە الاڭدامايتىن بولادى. بۇل – بارشامىز ءۇشىن ۇلكەن قۋانىش», دەدى ءبىلىم جانە عىلىم ۆيتسە-ءمينيسترى شولپان كارينوۆا.