مەملەكەت باسشىسى ەلىمىزدىڭ باس باسىلىمى «Egemen Qazaqstan» گازەتىنە جاريالانعان ماقالاسىندا تاۋەلسىز ەل بولۋ ونى جاريالاۋمەن نەمەسە مەملەكەتتىڭ ىرگەتاسىن قالاۋمەن عانا شەكتەلمەيتىنىن ايتتى, - دەپ حابارلايدى Egemen.kz
ء«بىز نە ىستەسەك تە, ءبارىن كەلەر ۇرپاق ءۇشىن جاسايمىز. مەملەكەتتىك ساياساتتىڭ بولاشاق الدىنداعى جاۋاپكەرشىلىگىن تەرەڭ سەزىنەمىز. بۇل ۇستانىمنان ەشقاشان اينىمايمىز. ەڭ عاجايىپ ەرلىكتەر وتانعا شەكسىز سۇيىسپەنشىلىكتەن تۋىندايتىنى ءسوزسىز. شىن وتانسۇيگىشتىك دەگەنىمىز – جالاڭ ۇران تاستاۋ ەمەس, ەلىڭە, حالقىڭا قىزمەت ەتۋ», - دەيدى ەل پرەزيدەنتى.
قازاقستان پرەزيدەنتى ادام بالاسى دۇنيەگە پاتريوت بولىپ كەلمەيتىنىن, ول تەك ءبىلىم مەن تاربيە الىپ, الەۋمەتتىك ورتامەن ارالاسىپ, ازاماتتىق بولمىسىن قالىپتاستىرۋ كەزىندە پاتريوتقا اينالاتىنىن ەسكە سالىپ ءوتتى.
ء«وزىنىڭ جەكە ماقسات-مۇددەلەرى قوعام يگىلىگىمەن ۇندەسىپ, ەلىنىڭ دامۋىنا ەلەۋلى ۇلەس قوسىپ جاتقانىن جان-جۇرەگىمەن سەزىنگەن ادام ناعىز باقىتقا كەنەلەدى. حالقىمىزدىڭ ءبىرتۋار پەرزەنتى ءاليحان بوكەيحانوۆ «ۇلتقا قىزمەت ەتۋ بىلىمنەن ەمەس, مىنەزدەن» دەگەن. ءبىز شىنايى پاتريوتتىق سەزىممەن رۋحتانىپ, قاسيەتتى تاۋەلسىزدىگىمىزدى ودان ءارى نىعايتا ءتۇسۋ ءۇشىن بىرلەسە جۇمىس ىستەۋىمىز كەرەك. بارشا وتانداستارىما, اسىرەسە, جاستارعا ايتارىم: كەڭ بايتاق قازاقستاندى اسقاق ارماندارىڭ مەن باتىل جوسپارلارىڭدى ەمىن-ەركىن جۇزەگە اسىرا الاتىن, تابىسىڭا مارقايىپ, ءاردايىم تىلەۋىڭدى تىلەيتىن قاسيەتتى وتانىڭ رەتىندە باعالاڭدار! مەن جاڭا قازاقستان ءپاتريوتيزمىنىڭ جاسامپازدىق قۇدىرەتىنە سەنەمىن. تاۋەلسىز ەل بولۋ ونى جاريالاۋمەن نەمەسە مەملەكەتتىڭ ىرگەتاسىن قالاۋمەن شەكتەلمەيدى», - دەيدى مەملەكەت باسشىسى.
سونىمەن بىرگە پرەزيدەنت تاۋەلسىزدىك ءۇشىن ناعىز كۇرەس كۇندەلىكتى ەڭبەكپەن, ۇزدىكسىز ءارى دايەكتى ەلدىك ساياساتپەن ماڭگى جالعاساتىن باسا ايتتى.
ء«بىز قۋاتتى تاۋەلسىز مەملەكەتىمىزبەن عانا ۇلت رەتىندە جەر بەتىندە ساقتالامىز. وسى اينىماس اقيقاتتى بەرىك ۇستانۋىمىز قاجەت. «تاۋەلسىزدىك بارىنەن قىمبات!» دەگەن ءبىر اۋىز ءسوز ماڭگى ۇرانىمىز بولۋعا ءتيىس. ۇلتىمىزدىڭ ۇلى ۇستىنى – قاستەرلى تاۋەلسىزدىگىمىز بارشا جۇرتىمىزدىڭ پاتريوتتىق رۋحىمەن اسقاقتاي بەرسىن!», - دەيدى پرەزيدەنت ق.توقاەۆ.