ساقىلداعان سارى اياز شىعىس قازاقستان وبلىسىندا ءالى بىرنەشە كۇنگە سوزىلادى. سوندىقتان پوليتسيا دەپارتامەنتىنىڭ قىزمەتكەرلەرى جۇرگىزۋشىلەر مەن جولاۋشىلارعا شالعاي ەلدى مەكەندەرگە شىقپاۋ كەرەكتىگىن ەسكەرتتى.
پوليتسەيلەردىڭ ايتۋىنشا, ازاماتتار ەلدى مەكەندەرگە ءجۇرىپ-تۇرۋ ماسەلەلەرى بويىنشا جەرگىلىكتى پوليتسيا قىزمەتى باسقارماسىنىڭ كەزەكشى بولىمىنە, ياعني 8(7232) 77-60-05 ءنومىرى بويىنشا تاۋلىك بويى حابارلاسا الادى.
ەسكەرتە كەتەيىك, 3 قاڭتار, ساعات 18-00-دەن باستاپ قوعامدىق كولىككە, سونداي-اق رەسپۋبليكالىق جانە وبلىستىق ماڭىزى بار اۆتوموبيل جولدارىندا ديزەلدى قوزعالتقىشتارمەن جابدىقتالعان اۆتوموبيلدەرگە ۋاقىتشا شەكتەۋلەر ەنگىزىلەدى.
- جۇرگىزۋشىلەردى جولداردا بارىنشا مۇقيات بولۋعا جانە جول ەرەجەسىن بۇزباۋدى سۇرايمىز. قاتتى ايازدا كولىكپەن, اسىرەسە تاس جولداردا پروبلەمالار تۋىنداۋى مۇمكىن ەكەنىن ەسكەرتەمىز. سوندىقتان ءوزىڭىزدى جانە جاقىندارىڭىزدى قورعاڭىز, جول جۇرۋدەن اۋلاق بولىڭىز, - دەپ كەڭەس بەردى وبلىستىق پوليتسيا دەپارتامەنتىنىڭ باستىعى ساعات ماديەۆ.
ماسەلەن, سەمەي قالاسىندا ءبىر كۇننىڭ ىشىندە 10-نان استام ازامات اياق-قولدارىنىڭ ءۇسۋى دياگنوزىمەن مەديتسينالىق مەكەمەلەرگە جۇگىندى.
بۇگىن وبلىستىڭ كەيبىر تۇستارىندا اياز -40 گرادۋسقا دەيىن كۇشەيدى.