الماتىلىق الەكساندر دانچەۆ وزگەشە ونەرىمەن كوپشىلىكتى ءتانتى ەتتى. سالماعى 26 توننا تارتاتىن الىپ ۆاگوندى ارقانعا بايلاپ, تىسىمەن جىلجىتقان ونىڭ ەسىمى قازاقستاننىڭ «كينەس» رەكوردتار كىتابىنا ەندى.
اقىلعا سىيىمسىز بولىپ كورىنەتىن وسى ءبىر ەرمەك ءبىزدىڭ ەلدە اسا تانىمال بولماعانىمەن, ەۋروپا مەن امەريكادا تابىستى سپورت ءتۇرى سانالادى. بۇل ناتيجە ازۋى ايبارلى الەكساندردىڭ العاشقى رەكوردى ەمەس, ول بۇعان دەيىن دە وسى جولعى ناتيجەگە جەتەقابىل ونەر كورسەتىپ, شەتەلدىك اۋەسقويلاردى تاڭعالدىرعان بولاتىن. العان بەتىنەن قايتپايتىن قايسار جىگىت بۇل جولى سالماعى ءزىل باتپان تەمىر ۆاگوندى ەكى جارىم مەترگە دەيىن سۇيرەدى.
– بالا كۇنىمنەن بۇل ىسكە ەرەكشە قۇمارتتىم. عالامتور كەڭگە قانات جايعالى بەرى امەريكالىقتاردىڭ كولىكتى قالاي سۇيرەپ جاتقانىن ۇنەمى تاماشالايتىن بولدىم. قىزىعۋشىلىعىم ويانىپ, جەڭىل كولىكتەردى تىسىممەن جىلجىتا باستادىم. ناتيجەسىندە, وسى دەڭگەيگە جەتتىم. بۇل جاتتىعۋدى ورىنداۋ وتە كۇردەلى ءارى ۇزاق ۋاقىتتى قاجەت ەتەدى. مۇنداي جاتتىعۋدى ەشكىمگە قايتالاماۋعا كەڭەس بەرەمىن, – دەيدى رەكوردشى.
قازاقستان رەكوردتار كىتابى تىركەۋ دەپارتامەنتىنىڭ ديرەكتورى باقىتجان تاستۇلەكوۆتىڭ سوزىنشە, ءبىزدىڭ ەلىمىزدىڭ رەكوردتار كىتابىنىڭ باسقا رەكوردتار كىتاپتارىنان ەرەكشەلىگى ادام دەنساۋلىعىنا زاقىم كەلەتىن جايتتار جەتىستىك رەتىندە تىركەلمەيدى. بىراق تىسپەن اۋىر كولىكتەر مەن ۆاگونداردى سۇيرەۋ الەم ەلدەرىندە الدەقاشان سپورت رەتىندە مويىندالعاندىقتان, الەكساندر العا قويعان ماقساتىنا قول جەتكىزىپ وتىر. مۇنىمەن توقتاپ قالمايمىن دەگەن ول وسى ونەرىمەن التى قۇرلىقتى مويىنداتۋدى ارماندايتىنىن ايتادى.
الماتى