اتىراۋ قالاسىنداعى وبلىستىق دارىندى بالالارعا ارنالعان مامانداندىرىلعان مەكتەپ-ليتسەي-ينتەرناتىندا انا تىلىمەن بىرگە اعىلشىن ءتىلىن جەتىك مەڭگەرگەن وقۋشىلار بار. سولاردىڭ قاتارىنداعى 11-سىنىپ وقۋشىلارى اقبوتا جۇباتقان مەن ايدانۋر دەميردجي حالىقارالىق عىلىمي جوبالار سايىسىنىڭ ۇزدىگى اتانىپ وتىر.
ولار جاقىندا برازيليانىڭ نوۆو-گامبۋرگ قالاسىندا «MOSTRATEC» 35-حالىقارالىق ءبىلىم كورمەسىنە قاتىستى. وندا الەمنىڭ 35 ەلىنەن 752 وقۋشى باق سىناعان ەدى. بۇل دودادا اتىراۋ وبلىستىق دارىندى بالالارعا ارنالعان مامانداندىرىلعان مەكتەپ-ليتسەي-ينتەرناتىنىڭ 11-سىنىپ وقۋشىسى اقبوتا جۇباتقان ماتەماتيكا پانىنەن ءى ورىندى يەلەندى. ءبىلىم ۇياسىنىڭ تاعى ءبىر 11-سىنىپ وقۋشىسى ايدانۋر دەميردجي تاريح پانىنەن ءىىى ورىن الدى.
– جاز ماۋسىمىنىڭ اياقتالۋىنا ون شاقتى كۇن قالعاندا سىنىپ جەتەكشىمىز «Mostratec» اتتى حالىقارالىق عىلىمي جوبالار سايىسى وتەتىنىن حابارلادى. سول حاباردى ەستىگەن سوڭ دايىندالا باستادىم. الايدا پاندەمياعا بايلانىستى اتالعان سايىس قاشىقتان وتەتىن بولدى. سوعان قاراماستان, سايىس وتە قىزىقتى ءوتتى ءارى مول تاجىريبە جينادىق. بايقاۋ «Jitsi meet» اتتى ۆيدەو-كونفەرەنتسيالارعا ارنالعان ءموبيلدى قوسىمشانىڭ كومەگىمەن ءوتتى. ءبىز ءوز جوبامىزدى اعىلشىن تىلىندە قورعادىق, – دەيدى اقبوتا جۇباتقان.
اتىراۋلىق وقۋشىلاردى اتالعان جوباعا قىزدار ليتسەيىنىڭ بەيىندى وقۋ ءىسىنىڭ مەڭگەرۋشىسى وكسيۋز راحمان مەن ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ وقىتۋشىسى اققابىل ابيروۆ دايىنداعان.
اتىراۋ وبلىسى