بەلگىلى جازۋشى الەكساندر بەكتىڭ ايگىلى باۋىرجان مومىش ۇلى جونىندە تولعاعان «ۆولوكولامسك تاس جولى» كىتابىنىڭ العى ءسوزىن جازعان اسكەري عالىم, وتستاۆكاداعى پولكوۆنيك كيم سەرىكباي ۇلى: «مىناۋ سوعىس جىلدارىنىڭ قەزىندە ۆولوكولامسك تاس جولىنىڭ باتىرلارى تۋرالى العاشقى اڭگىمەلەر «زناميا» جۋرنالىندا جاريالاعاندىعى بەلگىلى.
جۋرنالدار مايداندا دا, تىلدا دا ابدەن توزىعى جەتكەنشە وقىلدى. كوپتەگەن ەلدەردە بۇل كىتاپ اسكەري وقۋ ورىندارىنىڭ ستۋدەنتتەرىنە مىندەتتى تۇردە وقىتىلادى. ونى قازىر دە وقىپ, دايەكسوز كەلتىرۋدە, ال كۋبادا, يزرايلدە جانە باسقا دا ەلدەردە اسكەري وقۋ ورىندارىنىڭ تۇلەكتەرى بۇل كىتاپتى ديپلوممەن بىرگە الادى», دەپ جازعانى بار.
وزگە مەملەكەتتەر اسكەري وقۋ ورنىن بىتىرگەن كۋرسانتتارىنا قازاقتان شىققان داڭقتى باتىر تۋرالى كىتاپتى ارداقتاپ ۇسىنىپ جاتسا, باتىردىڭ تۋعان ەلىندە دە اسكەري ءبولىمنىڭ قۇرىلعانىنا 89 جىل تولۋىنا وراي 26 جەلتوقساندا شەكاراشى كۋرسانتتارعا وسى كىتاپ سالتاناتتى تۇردە تاپسىرىلدى.
– عاسىرعا جۋىق تاريحى بار ۇقك شەكارا اكادەمياسىنىڭ الدىندا مايور قانات بەردىقۇلوۆ جەتەكشىلىك ەتەتىن 4-وقۋ ديۆيزيونىنىڭ 200-دەن استام كۋرسانتى سالتاناتتى تۇردە ساپ تۇزەدى. ءار كۋرسانتقا ءبىر-ءبىر دانادان ۇلەستىرىلگەن كىتاپتىڭ العاشقى بەتىندە اكادەميا باستىعىنىڭ شاعىن عانا جازعان ەستەلىگى بار, – دەيدى اكادەميانىڭ ءباسپاسوز حاتشىسى جانات جابىربەكوۆ.
ءيا, «ۆولوكولامسك تاس جولى» كىتابى الەمدىك ادەبيەتتە ءوزىنىڭ لايىقتى ورنىن الدى. بۇل ارقاشان دەرەكتى-كوركەم جانە زياتكەرلىك قۇندىلىق بولىپ قالا بەرەدى. بۇل زاڭدى دا, ويتكەنى اقيقات پەن ادىلدىك ارقاشان تاريحپەن جانە بولاشاقپەن بىرگە جۇرەدى.