ازىق-ت ۇلىك قاۋىپسىزدىگىن قامتاماسىز ەتۋ قاشاندا ماڭىزدى. نەگىزىنەن اۋىل شارۋاشىلىعىنا يەك سۇيەگەن ءوڭىر ءۇشىن ءونىم وڭدەۋ مەيلىنشە وزەكتى. وسى ورايدا تابىس كىلتىن تاپ باسىپ, شارۋاشىلىقتى ورگە سۇيرەپ كەلە جاتقاندار دا بارشىلىق.
شالعايداعى «زولوتايا نيۆا» سەرىكتەستىگى اقىق ءدان ءوسىرىپ, اقتىلى مال باعىپ وتىرعان وزات شارۋاشىلىقتاردىڭ ساناتىندا. بۇگىندە ماڭداي تەرمەن وسىرگەن استىعى مەن مال ونىمدەرىن وڭدەپ, تولىق كلاستەرلىك جۇيەگە كوشىپ, تابىستارىن ەسەلەي ءتۇسىپ وتىر.
جاڭا زاماننىڭ تالابىنا تولىق جاۋاپ بەرەتىن مال بازى ەكى جىل بۇرىن سالىنعان ەكەن. ءبارى رەت-رەتىمەن. ايتالىق, جەلىندەگەن سيىرلار ءبىر بولەك, بۇزاۋ-تورپاعى بولەك باعىلادى. جالعىز مالدىڭ عانا ەمەس, مالشىنىڭ دا جاعدايى قاپىسىز ەسكەرىلگەن. ولاردىڭ جۇمىستان بوس ۋاقىتىندا تىنىعۋىنا, تۇسكى اس ىشۋىنە بارلىق جاعداي جاسالعان.
شارۋاشىلىقتىڭ 600 باستان استام انگۋس سيىرى بار. مامانداردىڭ ايتۋىنا قاراعاندا, شىعىنى مول قارا مال باققان سوڭ قاۋمەتى جەتىپ جاتسا, ءونىمى مول اسىل تۇقىمدى باققان دۇرىس. بىراق بۇل ارادا ەسكەرە كەتەتىن ءبىر جايت, كۇي تالعايتىن اسىل تۇقىمنىڭ عىلىمي نەگىزبەن ساراپتالعان ازىق-ت ۇلىگى قامدالۋى قاجەت. شارۋاشىلىق باسشىلارى بۇل تالاپتى مۇلتىكسىز ورىنداپ كەلەدى. مال ازىعىن بايىتىپ بەرۋگە مۇمكىندىك جەتىپ جاتىر. بيىل اۋا رايى ونشالىقتى قولايلى بولماسا دا, ءبىر جارىم جىلعا ەركىن جەتەتىن جەم-ءشوپ قورىن دايىنداپ الىپتى.
– قۇلازىپ جاتقان قۋ دالا ەدى, – دەيدى سەرىكتەستىك ديرەكتورىنىڭ ورىنباسارى سەرگەي دميتريچەنكو, – اۋەلى جاقسىلاپ تۇرىپ ەكى باز سالىپ الدىق. ءبىر جارىم مىڭ توننا مال ازىعى سىياتىن قويمانى دا دايىندادىق. ەڭ باستىسى – ادامدار تۇراقتى تابىس تاباتىن جۇمىس كوزى بار. قازىر مال شارۋاشىلىعىمەن وننان استام ادام شۇعىلدانادى. جالاقىلارىن ۋاقتىلى الىپ وتىر.
ساپالى ەتكە سۇرانىس جوعارى. شارۋاشىلىق مال ونىمدەرىن تازا ەت كۇيىندە عانا ساتپاي, بىرنەشە ءتۇرلى ءونىم دايىندايدى. شيكىزاتى ساپالى بولعاندىقتان, ونىمدەرى دە ءوتىمدى. ويتكەنى, ەشبىر قوسپاسى جوق, تابيعي تازا. جەرگىلىكتى تۇرعىنداردى جوعارى سۇرىپتى ۇن مەن نان-توقاش ونىمدەرىمەن دە قامتاماسىز ەتۋدە. ناتيجەسىندە, تاعى دا جاڭا جۇمىس ورىندارى اشىلعان. شارۋاشىلىقتىڭ ناۋبايحاناسىندا ءدامى ءتىل ۇيىرەتىن نان ونىمدەرىنىڭ وننان استام ءتۇرى دايىندالادى. نان ساتاتىن دۇكەندەرىندەگى ءار بولكە ناننىڭ باعاسى – 75 تەڭگەدەن. سونداي-اق بۇل جەردەن جارتىلاي فابريكاتتاردى دا, تارتىلعان ەتتى دە ارزان باعامەن ساتىپ الۋعا بولادى.
يگىلىگىن ەل كورىپ وتىرعان كلاستەرلىك جۇيە شارۋاشىلىققا دا ءتيىمدى. وڭقاي اسىقتاي ءۇيىرىلىپ تۇرعان شارۋانىڭ اۋقىمىن كەڭەيتۋدى ويلاستىرعان شارۋاشىلىق باسشىلارى الداعى ۋاقىتتا ءونىم تۇرلەرىن ەسەلەي تۇسپەك. سايىپ كەلگەندە ەرەسەن ەڭبەكپەن ەگىن ەگىپ, مال وسىرگەن شارۋاشىلىقتار ونىمدەرىن شيكىزات كۇيىندە ەمەس, وڭدەپ وتكىزسە, ءىسى ورگە باساتىندىعىن ناقتى ىسىمەن دالەلدەپ وتىرعان وسى ءبىر قادامنىڭ بۇگىنگى تىنىسى وزگەگە ونەگە.
اقمولا وبلىسى,
جاقسى اۋدانى