شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن قازاقستان حالقى اسسامبلەياسىنىڭ قۇرىلىمدارى جانە قالالىق ەتنومادەني بىرلەستىكتەرىنىڭ توراعالارىمەن كەزدەسۋ جيىنى ءوتتى.
قالاداعى مەملەكەتتىك ەتنوساياساتتىڭ جۇرگىزىلۋ بارىسىمەن تانىسىپ, قاتىسۋشىلاردىڭ ۇسىنىس, پىكىرلەرىن تىڭداعان شاھار باسشىسى الداعى كەزەڭدەردە قالانىڭ ءوسىپ-وركەندەۋ جولىنداعى جۇمىستاردى بىرلەسە جۇزەگە اسىراتىنىن جەتكىزدى.
–تاۋەلسىزدىكتەن كەيىن قازاقستان حالقى اسسامبلەياسى ەلباسىنىڭ باستاماسىمەن قۇرىلعان بولاتىن. وسى ۋاقىتقا دەيىن ۇلتارالىق تاتۋلىقتىڭ ۇيىتقىسى بولىپ كەلدى. ەلدە قانداي قيىن جاعداي ورىن الماسىن ەتنوس وكىلدەرى بىرگە اتسالىسىپ كەلەدى. مەملەكەتتىك ءتىلدى دامىتۋ جانە ونى ارى قاراي جاڭعىرتۋ جولىندا بىرلەسە جۇمىس اتقارامىز, -دەدى قالا اكىمى.
كەزدەسۋدە قالاداعى ەتنوسارالىق احۋال جانە قوعامدىق كەلىسىم مەن جالپىۇلتتىق بىرلىكتى نىعايتۋ بويىنشا اتقارىلعان جۇمىستار جونىندە «قوعامدىق كەلىسىم» مەكەمەسىنىڭ باسشىسى ەربول بايقوناقوۆ باياندادى.
–پاندەميا احۋالىنداعى شەكتەۋلەردى ەسكەرە وتىرىپ, جۇمىس اۋقىمىن ونلاين-فورماتتا جۇرگىزۋگە باسىمدىق بەرىلدى. مەملەكەت باسشىسىنىڭ «حالىق ۇنىنە قۇلاق اساتىن مەملەكەت» قاعيداتى اياسىندا قوعامدىق ديالوگ الاڭدارى قۇرىلدى. سونىمەن قاتار, كارانتين كەزەڭىندە ەتنوس وكىلدەرىنىڭ قاتىسۋىمەن «اباي وقۋلارى» ەستافەتاسى, ء«ال-فارابي تاعىلىمى» تانىمدىق اكتسياسى, «مەن تۋىممەن ماقتانامىن» چەللەندجى, «قالامنىڭ تاريحي ورىندارى» ونلاين-ساياحاتى, «مەملەكەتتىك ءتىل – تۇعىرىم» ۆەبينارى, «ەلباسى جولىمەن» تانىمدىق ەكسپەديتسياسى, «تاۋەلسىزدىك تابىستارى» لەكتسيالارى ۇيىمداستىرىلدى, - دەدى ە.بايقوناقوۆ.
بۇگىندە شىمكەنت قالاسىندا 100-دەن استام ءتۇرلى ەتنوس وكىلدەرى ءومىر سۇرەدى. ال, قازاقستان حالقى اسسامبلەياسىنىڭ قاراماعىندا 16 ەتنومادەني بىرلەستىگى جۇمىس جاسايدى. قالاداعى ورتا ارناۋلى وقۋ ورىندارىندا 29 «دوستىق» كلۋبى اشىلعان. سونىمەن قاتار, ميلليوندى شاھاردىڭ ۇلتتىق قۇرامىندا قازاقتار 66,7%, وزبەك 17,7%, ورىس 9,1%, وزگە ەتنوستار 6,5 پايىزدى قۇراپ وتىر. قالادا جىل سايىن ءار ەتنومادەني بىرلەستىك ءوزىنىڭ ءتىلى مەن مادەنيەتى جانە ءداستۇرى كۇندەرىن اتاپ وتەدى.