جامبىل وبلىسىندا وقۋشىلار ءۇشىنشى توقساندا قالاي وقيدى؟

گۇلنار حودجابەرگەنوۆا ءۇشىنشى توقساندا 1-5 سىنىپ وقۋشىلارى «كەزەكشى سىنىپتاردا» وقۋلارىن جالعاستىراتىنىن, مەكتەپ ءبىتىرۋشى 9 جانە 11 سىنىپ وقۋشىلارى ارالاس فورماتتا 15 ادامنان اسپايتىن «كەزەكشى سىنىپتار» رەجيمىندە وقۋدى باستايتىنىن, ساباق ۋاقىتى 30 مينۋتتان اسپايتىنىن جانە ءۇزىلىس 5 مينۋتتان بولاتىنىن ايتتى.

سونداي-اق, باسقارما باسشىسىنىڭ ايتۋىنشا, 70 پايىز پاندەر وففلاين وتەتىن ساباق كەستەسىنە ەنگەن. بۇل قاتاردا قازاق ءتىلى مەن ادەبيەتى, ورىس ءتىلى مەن ادەبيەتى, شەت ءتىلى, الگەبرا, گەومەتريا, فيزيكا, حيميا, بيولوگيا, گەوگرافيا, قازاقستان تاريحى جانە دۇنيەجۇزى تاريحى ءپانى بار. ويتكەنى وقۋشىلار اتالعان پاندەردەن  ۇلتتىق بىرىڭعاي تەستىلەۋ جانە مەملەكەتتىك ەمتيحان تاپسىراتىندىقتان, ءداستۇرلى تۇردە وقىتىلادى. ال, قالعان 30 پايىز پاندەر, ياعني ينفورماتيكا, ءوزىن-ءوزى تانۋ, دەنە شىنىقتىرۋ, قۇقىق نەگىزى جانە العاشقى اسكەري تەحنولوگيالىق دايىندىق  ساباقتارى قاشىقتان وقىتىلادى.

بۇگىنگى تاڭدا وبلىس بويىنشا 455 مەكتەپتە 240 مىڭ 713 وقۋشى وقيدى ەكەن. ء وڭىردىڭ باس پەداگوگى الداعى ۋاقىتتا دا وسى مەجەدە مەكتەپتەر ءوز جۇمىسىن باستايتىنىن, وبلىس بويىنشا 40 مىڭعا جۋىق بالاعا تەگىن تاماق, تەگىن كيىم-كەشەك, وقۋ قۇرالدارى جانە جازدا ءبىر رەتتىك ساۋىقتىرۋ لاگەرلەرلەرىنە بارۋ سياقتى تەگىن كومەك كورسەتىلىپ جاتقانىن دا جەتكىزدى. «ۇكىمەتتىڭ №64 قاۋلىسىنا سايكەس, اتالعان تەگىن كومەككە بيۋدجەتتەن قاراجات بولىنەدى. قاۋلىدا كورسەتىلگەندەي, ءبىر رەتتىك ىستىق تاماق بالالاردىڭ وقۋ ورنى بويىنشا بەرىلەدى. دەمەك, بالا وقۋ ورنىنا كەلسە, تاماقتانادى, ال كەلمەگەن جاعدايدا تاماقتانبايدى. سايكەسىنشە, قاراجات تا بولىنبەيدى.

بۇگىندە وقۋشىلار ءداستۇرلى فورماتتا وقىعان كۇندە دە, اسحانالار ىسكە قوسىلعان جوق. سەبەبى, سانيتارلىق دارىگەردىڭ قاۋلىسىنا سايكەس, اسحانالاردىڭ ىسكە قوسىلۋىنا رۇقسات جوق. ال, بالانىڭ تاماقتانۋىنا بولىنگەن قاراجات, سول ءبىلىم مەكەمەلەرىنىڭ باسقا دا قاجەتتىلىگىنە جۇمسالدى», دەدى گۇلنار حودجابەرگەنوۆا.