الماتى وبلىسى ەڭبەكشىقازاق اۋدانىنىڭ پوليتسيا قىزمەتكەرلەرى ۇرلىقپەن اينالىسقان 33 پەن 44 جاس ارالىعىنداعى ءۇش ادامنان قۇرالعان قىلمىستىق توپتى قۇرىقتادى, – دەپ حابارلايدى Polisia.kz.
– جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە ەڭبەكشىقازاق اۋدانىنىڭ پب كريمينالدىق پوليتسيا قىزمەتكەرلەرى اۋدان اۋماعىندا بىرقاتار ۇرلىقتار جاسادى دەگەن كۇدىكپەن ءۇش ادامدى ۇستادى. بۇگىندە ولاردىڭ بوتەننىڭ مۇلكىن ۇرلاۋدىڭ بەس دەرەگىنە قاتىسى دالەلدەندى. مىسالى, كۇدىكتىلەر ەركىن قول جەتكىزۋ ارقىلى قۇنى 900 مىڭ تەڭگە بولاتىن 40 توننالىق كونتەينەردى ۇرلاپ كەتكەن. سونداي-اق پلاستيكالىق تەرەزەلەر ارقىلى پاتەرلەرگە كىرىپ ۇرلىق جاساعان, وندا ءبىر جابىرلەنۋشىگە 1 ملن 235 مىڭ تەڭگە كولەمىندە زالال كەلتىرىلگەن, – دەيدى ەڭبەكشىقازاق اۋداندىق پب باستىعى تالعات سەيىلحانوۆ.
تەرگەۋ بارىسىندا كۇدىكتىلەردىڭ ءبىرىنىڭ بۇرىن توناۋ مەن ۇرلىق دەرەكتەرى ءۇشىن قىلمىستىق جاۋاپكەرشىلىككە تارتىلعانى انىقتالدى.
– بارلىق كۇدىكتىلەر ءوز ءىس-ارەكەتتەرىن مويىندادى. ۇستالعان كۇدىكتىلەر ءبىرىنىڭ بۇعان دەيىن دە وسىنداي قىلمىس تۇرلەرىن جاساعانى بەلگىلى بولدى. سونىمەن قاتار, ول قىلمىستىڭ نەعۇرلىم اۋىر ءتۇرى – توناۋ دەرەگىن جاساعانى ءۇشىن دە جاۋاپكەرشىلىككە تارتىلعان. قازىرگى تاڭدا كۇدىكتىلەر قر قىجك 128-بابىنىڭ تارتىبىمەن ەڭبەكشىقازاق اۋداندىق پب ۋاقىتشا ۇستاۋ يزولياتورىنا قاماۋعا الىندى. ولارعا قاتىستى قر قك-ءنىڭ 188-بابى (ۇرلىق) بويىنشا سوتقا دەيىنگى تەرگەۋ امالدارى جۇرگىزىلۋدە, – دەپ تولىقتىردى تالعات سەيىلحانوۆ.
وزگە اقپارات قر قىجك-ءنىڭ 201-بابىنىڭ تارتىبىمەن تەرگەۋ مۇددەسىنە سايكەس جاريا ەتىلمەيدى.