نۇر-سۇلتاندا حالىقتىڭ الەۋمەتتىك وسال توپتارى ساناتىنداعى 300-دەن استام وتباسى پاتەر كىلتتەرىن الدى.
ولاردىڭ اراسىندا جەتىم بالالار, 1 جانە 2 توپ مۇگەدەكتەرى, ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلار, زەينەتكەرلەر, تولىق ەمەس وتباسىلار, ۇوس ارداگەرلەرىنە جەڭىلدىكتەر بويىنشا تەڭەستىرىلگەندەر جانە ت.ب. بار.
ەلوردادا مەملەكەت باسشىسىنىڭ تاپسىرماسى بويىنشا بيىل قولجەتىمدى تۇرعىن ءۇي قۇرىلىسىنىڭ كولەمى ءۇش ەسە ۇلعايتىلدى. قازىردىڭ وزىندە 7 مىڭنان استام الەۋمەتتىك پاتەر ۇلەستىرىلدى, ولاردىڭ ءبىر بولىگى تۇرعىن ءۇي قۇرىلىس جيناق بانكىنىڭ كەزەگىندە تۇرعاندار. ءىس قاعازدارىن جۇرگىزۋ جانە پاتەر العان ازاماتتاردى كەزەكتەن شىعارۋ بويىنشا جۇمىستىڭ سوڭعى كەزەڭى جۇرگىزىلۋدە.
«جاڭا جىل قارساڭىندا قالالىقتاردىڭ تاعى ءبىر بولىگى جاڭا قونىس يەلەرى اتاندى. جاڭا جىلدى جىلدار بويى كۇتكەن پاتەرلەرىڭىزدە قارسى الاسىزدار. ءۇيدىڭ ورنالاسقان جەرى وتە ىڭعايلى, وزەن جاعاسىندا. جاقىن جەردە كەڭ اۋلالار, مەكتەپ جانە بالاباقشالار بار. ۇيلەرىڭىز تەك قۋانىشتى وقيعالارعا تولى بولسىن!», - دەدى اكىمنىڭ ورىنباسارى نۇرلان نۇركەنوۆ كىلتتى سالتاناتتى تاپسىرۋ كەزىندە.
ەلوردا اكىمى التاي كولگىنوۆتىڭ تاپسىرماسى بويىنشا بيىل بىرقاتار تۇرعىن ءۇي باعدارلامالارىنا وزگەرىستەر ەنگىزىلدى, مىسالى, قازاقستان يپوتەكالىق كومپانياسىمەن بىرلەسىپ جۇزەگە اسىرىلعان تۇرعىن ءۇي باعدارلاماسىنا سايكەس, ءبىلىم جانە دەنساۋلىق ساقتاۋ سالاسىنىڭ قىزمەتكەرلەرىنەن باسقا ءورت سوندىرۋشىلەر, الەۋمەتتىك قىزمەتكەرلەر, مادەنيەت جانە سپورت قىزمەتكەرلەرى, پوليتسيا قىزمەتكەرلەرى دە الەۋمەتتىك پاتەر الۋشىلار تىزىمىنە ەنگىزىلدى. سونىمەن قاتار تۇرعىنداردىڭ الەۋمەتتىك جاعىنان وسال توپتارىنىڭ بارلىق ساناتتارى تۇرعىن ءۇي سەرتيفيكاتىن الۋشىلار تىزىمىنە ەنگىزىلدى. 2021 جىلدان تۇرعىن ءۇي سەرتيفيكاتتارىنىڭ كولەمىن 1 ميلليوننان 1,5 ميلليون تەڭگەگە دەيىن ارتتىرۋ جوسپارلانۋدا.
«جىلداپ كۇتكەن جاڭا پاتەرلەرىنە كوشىپ جاتقان ءار وتباسىنا قۋانىشتىمىز. ەل باسشىلىعى باسپانا ماسەلەسىنە ەرەكشە نازار اۋدارادى. 2021 جىلدىڭ باسىندا ءبىز تۇرعىنداردىڭ الەۋمەتتىك وسال توپتارىنان كەزەكتە تۇرعاندارعا پاتەر كىلتتەرىن تابىستايمىز.
2021 جىلى ءبىز قازىرگى رەكوردتىق قارقىندى ۇستاپ قانا قويماي, قولجەتىمدى تۇرعىن ءۇي قۇرىلىسىنىڭ كولەمىن ۇلعايتامىز. مەن سونداي-اق قيىن جىل بولعانىمەن جۇمىسىن جالعاستىرعان قۇرىلىسشىلارىمىزعا العىس ايتامىن», - دەدى ەلوردا اكىمى التاي كولگىنوۆ.