مۇگەدەكتىگى بار ادامدار ونى راستايتىن قۇجاتتاردى ەندى ونلاين الا الادى, دەپ حابارلايدى Egemen.kz قر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
28 جەلتوقساننان باستاپ «ەلەكتروندىق ۇكىمەت» پورتالىندا (eGov) قر ەڭبەك جانە حالىقتى الەۋمەتتىك قورعاۋ مينيسترلىگىنىڭ «مۇگەدەكتىكتى جانە/نەمەسە ەڭبەك ەتۋ قابىلەتىنەن ايىرىلۋ دارەجەسىن بەلگىلەۋ جانە/نەمەسە قاجەتتى الەۋمەتتىك قورعاۋ شارالارىن ايقىنداۋ» مەملەكەتتىك قىزمەت كورسەتۋ كەزىندە بەرىلەتىن قۇجاتتاردىڭ ەلەكتروندىق نىساندارىن الۋ قولجەتىمدى.
بۇل قىزمەتتى «ەڭبەك رەسۋرستارىن دامىتۋ ورتالىعى» اق مەن «ۇلتتىق اقپاراتتىق تەحنولوگيالار» اق بىرلەسىپ, تۇڭعىش پرەزيدەنت نۇرسۇلتان نازارباەۆتىڭ 2018 جىلعى 5 قازانداعى قازاقستان حالقىنا جولداۋىن, سونداي-اق مەملەكەت باسشىسى قاسىم-جومارت توقاەۆتىڭ 2020 جىلعى 4 ناۋرىزداعى «تسيفرلىق قازاقستان» مەملەكەتتىك باعدارلاماسىن ىسكە اسىرۋ جونىندەگى تاپسىرماسىن ورىنداۋ شەڭبەرىندە جۇرگىزىلەتىن الەۋمەتتىك ەڭبەك سالاسىنداعى مەملەكەتتىك قىزمەتتەردى وڭتايلاندىرۋ جانە اۆتوماتتاندىرۋ جونىندەگى جۇمىس بارىسىندا ىسكە اسىردى.
وسىلايشا, eGov پورتالىندا كەلەسى قۇجاتتاردىڭ ەلەكتروندىق نىساندارىن الۋعا بولادى:
-مۇگەدەكتىك تۋرالى انىقتاما;
-جالپى ەڭبەك ەتۋ قابىلەتىنەن ايىرىلۋ دارەجەسى تۋرالى انىقتاما; -كاسىپتىك ەڭبەككە قابىلەتتىلىگىنەن ايىرىلۋ دارەجەسى تۋرالى انىقتاما;
-كاسىپتىك ەڭبەككە قابىلەتتىلىگىنەن ايىرىلۋ دارەجەسى تۋرالى انىقتامادان جانە مەديتسينالىق-الەۋمەتتىك ساراپتاما اكتىسىنەن ءۇزىندى كوشىرمە;
-زارداپ شەككەن قىزمەتكەردىڭ كومەك پەن كۇتىمنىڭ قوسىمشا تۇرلەرىنە مۇقتاجدىعى تۋرالى قورىتىندى;
-وڭالتۋدىڭ جەكە باعدارلاماسىنىڭ الەۋمەتتىك بولىگىنەن ءۇزىندى كوشىرمە;
-وڭالتۋدىڭ جەكە باعدارلاماسىنىڭ كاسىپتىك بولىگىنەن ءۇزىندى كوشىرمە;
-مەديتسينالىق-الەۋمەتتىك ساراپتامانىڭ ساراپتامالىق قورىتىندىسى تۋرالى حابارلاما;
-تولىق وڭالتۋ تۋرالى حابارلاما.
مۇگەدەكتىگى بار بالالاردىڭ اتا-انالارىنا جانە مۇگەدەكتىگى بار ادامداردىڭ قامقورشىلارىنا بالاعا نەمەسە قورعانشىعا جوعارىدا اتالعان ەلەكتروندىق قۇجاتتاردى الۋعا بولادى.