جاڭا جىل مەرەكەسىنە وراي جامبىل وبلىسىندا 200 بالاعا قازاقستان رەسپۋبليكاسى پرەزيدەنتىنىڭ سىيلىعى تابىستالدى, دەپ حابارلايدى Egemen.kz.
ولاردىڭ قاتارىندا اتا-اناسىنىڭ قاراۋىنسىز قالعان, جەتىم, كوپبالالى جانە از قامتىلعان وتباسىدان شىققان, ەرەكشە ءبىلىم بەرۋدى قاجەت ەتەتىن 9-13 جاس ارالىعىنداعى بالالار بار.
جامبىلدىق بالالارعا مەملەكەت باسشىسىنىڭ اتىنان قۇتتىقتاۋ حات, ەكى تىلدەگى « ۇلى اباي» ەنتسيكلوپەدياسى مەن «قازاق ەرتەگىلەرى» جيناعى, سونداي-اق, ءتاتتى سىيلىقتار جانە اقشالاي سەرتيفيكات بەرىلدى.
ەل پرەزيدەنتىنىڭ اتىنان كەلگەن سىيلىققا تاراز قالاسىنداعى ومىرلىك قيىن جاعدايداعى بالالاردى قولداۋ ورتالىعىنىڭ تاربيەلەنۋشىلەرى دە يە بولدى.
سونىمەن قاتار وڭىردەگى 100 بالاعا جامبىل وبلىسىنىڭ اكىمى اتىنان دا سىيلىقتار تابىستالدى. ءبىر ايتا كەتەرلىگى, ەلىمىزدەگى كارانتين جاعدايىنا بايلانىستى جانە ەلىمىزدىڭ ءبىلىم جانە عىلىم مينيسترلىگىنىڭ حاتىنا سايكەس, بيىل وبلىستا قازاقستان رەسپۋبليكاسىنىڭ پرەزيدەنتى, وبلىس اكىمى جانە قالا, اۋدان اكىمدەرى اتىنان جاڭاجىلدىق شىرشا كەشى ۇيىمداستىرىلمايتىن بولدى.