اقتاۋ قالاسىنىڭ تۇرعىندارى ايماق بيۋدجەتىنىڭ بولىنۋىنە ريزا ەمەس. بۇل ماسەلە تۋرالى ADAL پارتياسىنان دەپۋتاتتىققا كانديداتتارمەن كەزدەسۋدە ايتىلدى.
ماجىلىسكە دەپۋتاتتىققا كانديداتتار ەلدار جۇماعازيەۆ, ارداق نازاروۆ, ماقسات تولىقباي, ءلاززات شىڭعىسباەۆا, سونداي-اق پارتيا وكىلدەرى نۇرلىبەك مۇقانوۆ, ءانۋار كەرەمباەۆ اقتاۋ قالاسىنىڭ جۇرتشىلىعىمەن كەزدەستى.
ءوز سوزىندە ەلدار جۇماعازيەۆ پارتيانىڭ ماقساتى جەكەلەگەن قالالاردى دامىتۋ ەمەس, ەلىمىزدىڭ بارلىق وڭىرلەرىن دامىتۋ ەكەنىن اتاپ ءوتتى. «ماڭعىستاۋ ءوڭىرى – بىرەگەي ايماق. بىردەن بۇل جەردە مۇناي وندىرىلەتىنى جانە كوپ مۇناي كومپانياسى بار ەكەنى ويعا ورالادى. سونىمەن قاتار تۇرعىنداردىڭ پروبلەمالىق ماسەلەلەرگە شاعىمى كوپ. نەگىزگىسى – ادام كاپيتالى مەن تابىس», دەدى ە.جۇماعازيەۆ.
سونداي-اق ول وڭىرلەردى دامىتۋدىڭ قولدانىستاعى ستاندارتتارى ەسكىرگەنىن, سوندىقتان وڭىرلىك ساياساتتى تۇبەگەيلى وزگەرتۋ قاجەتتىگىنە توقتالدى. «بىزدە ەڭبەككە قابىلەتتىلىكتىڭ ۇلكەن كوەففيتسيەنتى بار. جۇمىس ورىندارىن اشىپ, وڭىرلىك باعدارلامالاردى جۇزەگە اسىرۋ قاجەت. بۇكىل كۇش – وڭىرلەردە», دەدى ول.
پارتيا وكىلدەرىنە جولداعان سۇراقتارىندا اقتاۋ قالاسىنىڭ تۇرعىندارى بيۋدجەت قاراجاتىن ءتيىمسىز جۇمساۋ سالدارىنان تۋىندايتىن ماسەلەلەردى قوزعادى.
سونىمەن قاتار ءماجىلىس دەپۋتاتتىعىنا كانديدات ماقسات تولىقباي مەن ءلاززات شىڭعىسباەۆا, سونداي-اق پارتيا وكىلى نۇرلىبەك مۇقانوۆ اقتاۋ قالاسىندا كوپ بالالى انالارمەن كەزدەسۋ وتكىزدى. كەزدەسۋ بارىسىندا اقتاۋ قالاسىنىڭ كوپ بالالى انالارى پارتيا وكىلدەرىنە وزدەرىنىڭ ارىز-شاعىمىن جەتكىزدى.
«قازىر قولىمدا 15 مىڭ تەڭگە عانا قالادى. مەن جۇمىستان باس تارتپايمىن, بىراق ۇيدە كىشكەنتاي بالا بار, سوندىقتان جۇمىسقا بارا المايمىن. بۇكىل ورگاندارعا جۇگىندىم, بىراق ەشقايسىسى ماعان كومەكتەسكەن جوق», دەدى پروبلەماسىن ايتقان انا.
تاعى ءبىر كوپ بالالى انا كىشكەنتاي بالالارىنا بايلانىستى جۇمىسقا ورنالاسا الماي جۇرگەنىن ايتادى. «مەنىڭ ءبىر جاستاعى بالام بار. بىزگە قاراجات جەتىسپەيدى. ماماندىعىم بويىنشا وقىتۋشىمىن. جۇمىسقا ورنالاسقىم كەلەدى, بىراق بالام ءبىر جاستا بولعاندىقتان بالاباقشالار ونى قابىلدامايدى. مەن نە ىستەۋىم كەرەك؟ جۇمىس ىستەگىم كەلەدى, بىراق بالانى قالدىراتىن جەر جوق», دەدى ايەل.
ايەلدەردى تىڭداعان ماقسات تولىقباي كوپ بالالى انالاردىڭ پروبلەمالارىنا قوعامنىڭ كوزقاراسى جەتىلمەگەنىن اتاپ ءوتتى. ول بۇل ماسەلەنى زاڭنامالىق دەڭگەيدە كوتەرۋگە ۋادە بەردى.
«انالارعا باسپانا ساتىپ الۋعا عانا ەمەس, جۇمىسپەن قامتاماسىز ەتۋگە دە كومەكتەسۋىمىز قاجەت. ءبىز كوپ بالالى انالاردىڭ مارتەبەسىن كوتەرۋىمىز كەرەك. مىندەتتى تۇردە ءبىرىنشى كەزەكتە زاڭنامالىق دەڭگەيدە انالار ماسەلەسىن كوتەرەمىز», دەدى م.تولىقباي.
سونداي-اق كەزدەسۋگە قاتىسۋشىلار قالاداعى جۇمىسسىزدىققا نازار اۋداردى. اقتاۋداعى كەزدەسۋلەرمەن قاتار, ADAL ۇمىتكەرلەرى سولتۇستىك قازاقستان وبلىسىندا كەزدەسۋلەر وتكىزدى.
كەزدەسۋلەردىڭ بىرىندە ياۆلەنكا اۋىلىنىڭ كاسىپكەرلەرى كاسسالىق ماشينالاردىڭ جوعارى كوميسسيالارىنا شاعىمداندى. ونى تولەۋ ءۇشىن ازىق-ت ۇلىك باعاسىن كوتەرۋ كەرەك, ال مۇنداي ادىسكە جۇگىنۋگە حالىقتىڭ تابىسى از دەيدى كاسىپكەرلەر.
سەرگەەۆكا اۋىلىندا تۇرعىندار سىبايلاس جەمقورلىق جانە ءبىلىم بەرۋ ماسەلەلەرىن قوزعادى. ايىرتاۋ اۋدانىنىڭ تۇرعىندارى اۋىز سۋدىڭ جوقتىعىنا نارازى. ولار سۋدى تاسىپ ءىشىپ وتىر. قىزىلجار ءوڭىرىنىڭ تۇرعىندارىنا كاسىپكەرلىك ءۇشىن جەر تەلىمىن الۋ قيىن ەكەنىنە توقتالدى.