الماتى اكىمى الاتاۋ اۋدانى تۇرعىندارىنىڭ تالاپ تىلەگىن تىڭدادى

الاتاۋ اۋدانىنداعى «باقىتتى وتباسى» الەۋمەتتىك قولداۋ ورتالىعىنىڭ بازاسىندا جۇزەگە اسىرىلعان «ىسكەر انا» جوباسىنا قاتىسۋشى كوپبالالى انالارمەن كەزدەسۋ كەزىندە قالا اكىمى نازىكجاندى ەڭبەككەرلەردىڭ جەتىستىكتەرىنە قىزىعۋشىلىق ءبىلدىردى.

الاتاۋ اۋدانىنداعى «باقىتتى وتباسى» ورتالىعىنىڭ جەتەكشىسى اقمارال باسيروۆا اعىمداعى جىلى 25 مىڭعا جۋىق ايەلدىڭ ءتۇرلى شەبەرلىك كۋرستارىندا ءبىلىم العاندارىن ايتتى. قازىردىڭ وزىندە ولاردىڭ كوپشىلىگى تابىستى ىسكەر جاندارعا اينالعان.

«كۇردەلى جاعدايلارعا تاپ بولعان كوپتەگەن ايەلدەردىڭ ءومىرى ءبىزدىڭ كوز الدىمىزدا وزگەرۋدە. قيىندىقتارعا قاراماستان, ولار ءوز كۇشتەرىنە سەنەدى ءارى جاڭا ىستەردى يگەرۋگە ۋاقىت تا تابادى», - دەيدى ا. باسيروۆا.

شاھار باسشىسى «ىسكەر انا» باعدارلاماسىنىڭ كوپبالالى انالاردى قولداۋعا باعىتتالعانىن ەسكە سالدى. ولار «باقىتتى وتباسى» اۋداندىق ورتالىقتارىنىڭ بازاسىندا «ەڭبەك» مەملەكەتتىك باعدارلاماسى اياسىندا كاسىپكەرلىك نەگىزدەرىن وقىپ-ۇيرەنەدى. كوپبالالى وتباسىلاردان شىققان 888 ادام 555 مىڭ تەڭگەگە دەيىن گرانت الدى. ولاردىڭ 557-ءسى وزدەرىنىڭ جەكە كاسىپتەرىن اشتى. تاعى 203 كوپبالالى انا 5 ميلليون تەڭگەگە دەيىن گرانت الدى, ونىڭ جالپى سوماسى 406 ملن تەڭگە.

ب. ساعىنتاەۆتىڭ ايتۋىنشا, اعىمداعى جىلى گرانتتاردىڭ جالپى سوماسى 200% -عا ۇلعايىپ, 700 ملن تەڭگەنى قۇرادى.

«باعدارلاما سۇرانىسقا يە جانە ناقتى ناتيجەلەردى كورسەتۋدە. سىزدەرمەن كەزدەسكەننەن كەيىن مەن بۇعان تاعى دا كوز جەتكىزدىم. اكىمدىك كوپبالالى انالار اراسىندا كاسىپكەرلىكتى دامىتۋعا قولداۋ كورسەتۋدى جالعاستىرادى. جەڭىلدەتىلگەن جالعا بەرىلەتىن ءۇي-جايلاردى, مىسالى, شاعىن وندىرىستىك پاركتەردە ورىنداردى الۋعا كومەكتەسەمىز. بۇلاردان وزگە, گرانتتارعا بولىنەتىن سومانى ۇلعايتۋ مۇمكىندىگىن قاراستىرامىز», - دەدى ب. ساعىنتاەۆ.

«زەردەلى» ىقشاماۋدانىنىڭ تۇرعىندارىمەن اڭگىمە بارىسىندا قالا اكىمى كوتەرىلگەن ماسەلەلەردىڭ نازاردان تىس قالمايتىنىن اتاپ ءوتتى. سونىڭ ءبىرى — «كىرىستىرۋ» دەپ اتالاتىن جوسپارلانعان قۇرىلىس, ياعني تۇرعىن ۇيلەرگە ىرگەلەس جاتقان ۋچاسكەلەردە قۇرىلىس جۇرگىزۋ.

ىقشاماۋداننىڭ بەلسەندى تۇرعىندارىنىڭ ءبىرى دانا راحيموۆا تۇرعىنداردىڭ «كىرىستىرۋ» قۇرىلىستارىنان قاۋىپتەنەتىنىن ايتتى. ونىڭ بۇل سوزىنە الماتى اكىمى ب. ساعىنتاەۆ ءوزىنىڭ تاپسىرماسى بويىنشا جەر قاتىناستارى باسقارماسىنىڭ وسىنداي جەتى ۋچاسكەنى مەملەكەت مەنشىگىنە قايتارۋ ماسەلەسىن قاراپ جاتقانىن جەتكىزدى.

«بۇل ۋچاسكەلەر ىرگەلەس سالىنعان ۇيلەر تۇرعىندارىنىڭ تىلەكتەرىنە ساي اباتتاندىرىلۋى ءتيىس. مۇمكىن مۇندا ويىن, سپورت نەمەسە بالالار الاڭدارى قاجەت شىعار», - دەپ اتاپ ءوتتى ب. ساعىنتاەۆ.

اڭگىمە بارىسىندا اكىم الاتاۋ اۋدانىن دامىتۋعا ەرەكشە نازار اۋدارىلاتىنىن, ونىڭ ورتالىقتاندىرۋ قاعيداتى بويىنشا جۇزەگە اسىرىلاتىنىن ايتىپ بەردى.