«قاراعاندى فارماتسەۆتيكالىق كەشەنى» جشس ديرەكتورى سەرگەي بارون وبلىس ورتالىعىندا وندىرىلگەن «سپۋتنيك V» ۆاكتسيناسى ساپا باقىلاۋىنان وتكەننەن كەيىن عانا وندىرىستىك اۋقىمدا شىعارىلاتىنىن ايتتى.
«2020 جىلدىڭ قاراشا ايىندا قازاقستاننىڭ دەنساۋلىق ساقتاۋ مينيسترلىگى مەن «رەسەيدىڭ تىكەلەي ينۆەستيتسيالار قورى» مەملەكەتتىك كومپانياسىنىڭ (رتيق) ماماندارى قازاقستاننىڭ فارماتسەۆتيكالىق كاسىپورىندارىن ارالاپ, ۆاكتسينانى ءوندىرۋ مەن ترانسفەر تەحنولوگياسىن تەزىرەك ىسكە اسىرۋعا دايارلىق بارىسىن زەرتتەگەن بولاتىن. سولاردىڭ ىشىندەگى ساقاداي-ساي دايىنى ءبىز بولىپ شىقتىق. ىزىنشە قازاقستاننىڭ دەنساۋلىق ساقتاۋ مينيسترلىگى مەن «رەسەيدىڭ تىكەلەي ينۆەستيتسيالار قورى» مەملەكەتتىك كومپانياسىنىڭ جۇمىس توبى قۇرىلدى. جەلتوقسان ايىنىڭ باسىندا ترانسفەر تەحنولوگياسى ۇدەرىسىن باستادىق. رەسەيدەن ماماندار كەلدى. ءبىز بارىنشا دايىندالدىق, كادرلاردى وقىتتىق, جابدىقتاردى ىسكە قوستىق. قازىر الداعى ۋاقىتتا سەريالىق ءوندىرىستى جولعا قويۋ ءۇشىن باسقا دا قاجەتتى جابدىقتاردى ساتىپ الىپ جاتىرمىز», دەدى س.بارون.
كەشەن باسشىسىنىڭ ايتۋىنشا, جەلتوقسان ايىنىڭ 21-ءى كۇنى شىعارىلعان «سپۋتنيك V» ۆاكتسيناسىنىڭ تاجىريبەلىك ۇلگىسى ساپا باقىلاۋىن جۇرگىزۋ ءۇشىن رەسەيگە جونەلتىلگەن. كورشى ەلدە اتالعان ءونىمدى ازىرلەگەن توپ ءبىر اي بويى جان-جاقتى ساپا باقىلاۋ جۇمىستارىن جۇرگىزەدى. ودان كەيىن دەنساۋلىق ساقتاۋ مينيسترلىگىنە ءوتىنىم جولدانىپ, ۆاكتسينانى قازاقستاندا تىركەۋ تۋرالى شەشىمنىڭ تاعدىرى تارازىعا تۇسەدى. ءساتىن سالىپ ءبارى وڭىنان بولىپ جاتسا, وندا ەل كۇتكەن ەكپە وندىرىستىك اۋقىمدا شىعارىلا باستايدى.
«سپۋتنيك V» ەكپەسى الەم بويىنشا كوروناۆيرۋس ينفەكتسياسىنىڭ الدىن الۋعا ارنالعان تۇڭعىش تىركەلگەن ۆاكتسينا ەكەن. پرەپارات رەسەي دەنساۋلىق مينيسترلىگىنىڭ ن.گامالەيا اتىنداعى ەپيدەميولوگيا جانە ميكروبيولوگيا ۇلتتىق زەرتتەۋ ورتالىعىندا ازىرلەنىپتى. ماماندار ەكپەنىڭ ادامنىڭ ادەنوۆيرۋس ۆەكتورى نەگىزىندە ازىرلەنگەنىن ايتادى. نەگىزىندە ادەنوۆيرۋستىق ۆەكتورلار تولىقتاي قاۋىپسىز بولىپ سانالادى جانە ولاردىڭ گەنەتيكالىق جەتىلدىرۋ ءۇشىن دە اسا قولايلى ەكەنىن ايتا كەتكەن ءلازىم.
ەكپەگە 1957 جىلى عارىشقا تۇڭعىش ساپار شەگىپ, كوسموس الەمىن زەرتتەۋگە سەرپىن بەرگەن «سپۋتنيك-1» جەر سەرىگىنىڭ اتاۋى بەرىلىپتى.
ايتا كەتەلىك, جۋىردا ۇكىمەت باسشىسى اسقار مامين قاراعاندى وبلىسىندا جۇمىس ساپارىمەن بولعان كەزدە «قاراعاندى فارماتسەۆتيكالىق كەشەنى» جشس-نا ات شالدىرىپ, رەسەيلىك «سپۋتنيك V» ۆاكتسيناسى ءوندىرىسىنىڭ تۇساۋكەسەر راسىمىنە قاتىسقان بولاتىن. اتالعان جوبا مەملەكەت باسشىسى قاسىم-جومارت توقاەۆ پەن رەسەي پرەزيدەنتى ۆلاديمير ءپۋتيننىڭ اراسىنداعى ۋاعدالاستىق اياسىندا جۇزەگە اسقان ەدى. فارماتسەۆتيكالىق كەشەن جۇمىسىمەن تانىسقان كەزىندە ۇكىمەت باسشىسى قازاقستاندا وندىرىلگەن «سپۋتنيك V» ۆاكتسيناسىن جاپپاي ەگۋ 2021 جىلدىڭ اقپان ايىنان باستالاتىنىن ءمالىم ەتكەن بولاتىن. ء«بىرىنشى كەزەكتە ەكپە مەديتسينا قىزمەتكەرلەرى, پەداگوگتەر, ستۋدەنتتەر, قۇقىق قورعاۋ ورگاندارىنىڭ قىزمەتكەرلەرى, مەديتسينالىق-الەۋمەتتىك مەكەمەلەردىڭ كونتينگەنتى, سونداي-اق سوزىلمالى اۋرۋلارى بار قاۋىپتىلىك توپتارىنىڭ وكىلدەرىنە ەرىكتى نەگىزدە سالىنادى», دەپ مالىمدەگەن-ءدى ا.مامين.