كۋرسانت ءولىمى: ءىىم الماتى اكادەمياسىنىڭ باستىعى قىزمەتىنەن بوساتىلدى

بقو, اقجايىق اۋدانىنىڭ تۋماسى سالامات وتەگەنوۆتىڭ قازا تابۋى كۇدىكتى ءىس وتاندىق باق-تا تەز تاراپ, قوعامنىڭ تالقىسىنا ءتۇستى. وسىعان بايلانىستى ىشكى ىستەر مينيسترلىگىنىڭ ءباسپاسوز قىزمەتى رەسمي مالىمدەمە جاساپ وتىر.

رەسمي اقپاراتتا الماتى قالاسىنىڭ پوليتسيا دەپارتامەنتى قر قك-ءنىڭ 105-بابى ء(وز-وزىنە قول جۇمساۋعا جەتكىزۋ) بويىنشا سوتقا دەيىنگى تەرگەۋ جۇرگىزۋدە. تەرگەۋ بارىسىندا قازا تاپقان ادامنىڭ تۋىستارى بايانداعان بارلىق دالەلدەر تەكسەرىلەتىنى ايتىلعان.

سونداي-اق وقۋ ورنىنا ىشكى ىستەر مينيسترلىگىنىڭ كادر ساياساتى جانە وزىندىك قاۋىپسىزدىك دەپارتامەنتتەرىنىڭ باسشىلىعى مەن جاۋاپتى قىزمەتكەرلەرىنەن ارنايى توپ جىبەرىلدى. تەكسەرۋ قورىتىندىسى بويىنشا ءىىم-دە تارتىپتىك كوميسسيا ءوتتى.

تەكسەرۋ جۇمىستارى اكادەميا باستىعى و.ح.سمايىلوۆتان دا اينالىپ وتكەن جوق. وزىنە سەنىپ تاپسىرىلعان بولىمشەدە جۇمىستى ۇيىمداستىرۋعا ءتيىستى باقىلاۋ جۇرگىزبەگەندىكتەن ىشكى ىستەر ءمينيسترىنىڭ بۇيرىعىمەن اتقارىپ وتىرعان لاۋازىمىنان بوساتىلدى.

قايعىلى جاعدايعا جول بەرگەن سمايىلوۆتىڭ يدەولوگيالىق تاربيە جانە كادر جۇمىسىنا جەتەكشىلىك ەتەتىن ورىنباسارىن دا قىزمەتىنەن بوساتۋ ۇسىنىلدى.

«سونىمەن قاتار, اكادەميانىڭ تاعى 16 جاۋاپتى قىزمەتكەرى قاتاڭ تارتىپتىك جاۋاپكەرشىلىككە تارتىلدى, ولاردىڭ 5-ءۋى اتقارىپ وتىرعان لاۋازىمدارىنان بوساتىلدى. اكادەميانىڭ وقۋ پروتسەسىنە, تۇرمىستىق جاعدايلارىنا, مورالدىق-پسيحولوگيالىق احۋالىنا, قارجى-شارۋاشىلىق قىزمەتىنە كەشەندى تەكسەرۋ تاعايىندالدى. وقۋ ورنىنا مينيسترلىكتىڭ ىشكى اۋديت, كادر ساياساتى جانە وزىندىك قاۋىپسىزدىك دەپارتامەنتتەرىنىڭ قىزمەتكەرلەرى جىبەرىلدى», دەلىنگەن مالىمدەمەدە. 

مينيستر ەرلان تۇرعىمباەۆتىڭ تاپسىرماسى بويىنشا وسىنداي تەكسەرۋلەر 2021 جىلدىڭ 1 توقسانىندا ءىىم-ءنىڭ بارلىق وقۋ ورىندارىندا جۇرگىزىلەدى.