ءماجىلىس دەپۋتاتتارى پەدوفيلدەردىڭ جازاسىن قاتاڭداتۋعا باعىتتالعان زاڭ جوباسىنا سەنات ەنگىزگەن تولىقتىرۋلاردى قابىلدادى, دەپ حابارلايدى Egemen.kz.
ءماجىلىس "كەيبىر زاڭنامالىق اكتىلەرگە پرەزيدەنتتىڭ 2020 جىلدىڭ 1 قىركۇيەگىندەگى جولداۋىنىڭ جەكەلەگەن ەرەجەلەرىن ىسكە اسىرۋ ماسەلەسى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنا سەنات ەنگىزگەن تولىقتىرۋلاردى قارادى.
بۇل زاڭ جوباسىندا پەدوفيلدەردىڭ جازاسىن قاتاڭداتۋعا باعىتتالعان نورمالار قاراستىرىلعان. ونىڭ ىشىندە بالالارعا قاتىستى جىنىستىق سيپاتتاعى قىلمىس جاساعاندارعا راقىمشىلىق جاسالمايدى جانە تۇرمەدەن مەرزىمىنەن بۇرىن بوساتىلمايدى. سونىمەن قاتار ولار جازاسىن قاتاڭ رەجيمدەگى مەكەمەدە عانا وتەيتىن بولادى.
بۇعان دەيىن سەنات دەپۋتاتتارى وعان بىرقاتار تولىقتىرۋ ەنگىزىپ, ماجىلىسكە جىبەرگەن بولاتىن. ءماجىلىس پارلامەنتتىڭ جوعارعى پالاتاسىنىڭ تولىقتىرۋلارىمەن كەلىستى.
سەنات توراعاسى ماۋلەن اشىمباەۆ زاڭ جوباسىن پارلامەنتتىڭ جوعارعى پالاتاسىندا قاراۋ كەزىندە ەلىمىزدە بالالاردى قورعاۋ سالاسىندا ناقتى الدىن الۋ ساياساتى جۇرگىزىلىپ جاتقانىن حابارلادى. وسى باعىت اياسىندا پەدوفيلدەردى قىلمىستىق جازالاۋ شارالارى ەداۋىر كۇشەيتىلىپ وتىر.
ءماجىلىس سەناتتىڭ تولىقتىرۋلارىمەن ءبىراۋىزدان كەلىسىپ, زاڭ مەملەكەت باسشىسىنا جىبەرىلدى.