ءابۋ دابي قالاسىندا قر ەلشىلىگىنىڭ ۇيىمداستىرۋىمەن, تۇركىستان وبلىسىنىڭ اكىمى ومىرزاق شوكەەۆ پەن حاليفا بەن زايد ءال ناحايان قايىرىمدىلىق قورىنىڭ باس ديرەكتورى مۇحاممەد حادجي ءال-ءحۋريدىڭ كەزدەسۋى ءوتتى.
كەزدەسۋ بارىسىندا تاراپتار ەكىجاقتى گۋمانيتارلىق ىنتىماقتاستىقتىڭ دامۋ ماسەلەلەرىن تالقىلادى.
كەلىسسوزدەر قورىتىندىسى بويىنشا اكىمدىك پەن قايىرىمدىلىق قورى اراسىندا تۇركىستان قالاسىندا شەيح مۇحاممەد بەن زايد ءال ناحايان اتىنداعى «انا مەن بالا ورتالىعىن» جوبالاۋ جانە سالۋ بويىنشا ءوزارا تۇسىنىستىك مەموراندۋمىنا قول قويىلدى.
قايىرىمدىلىق جوباسى جەرگىلىكتى دەنساۋلىق ساقتاۋ جۇيەسىن جاقسارتۋعا باعىتتالعان جانە امىرلىكتەر قورىنىڭ مەديتسينالىق مەكەمەنى سالۋدى جانە بارلىق قاجەتتى جابدىقتارمەن قامتاماسىز ەتۋدى قارجىلاندىرۋىن كوزدەيدى.
گۋمانيتارلىق گرانتتى ءبولۋ ەكىجاقتى دوستىق قاتىناستاردىڭ جانە قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن بىرىككەن اراب امىرلىكتەرىنىڭ پرەزيدەنتى شەيح حاليفا بەن زايد ءال ناحايان اراسىنداعى قول جەتكىزىلگەن ۋاعدالىستىقتاردىڭ ارقاسىندا مۇمكىن بولدى.
تۇركىستان وبلىسىنىڭ اكىمدىگى نىساندى تۇرعىزۋ ءۇشىن قالا ورتالىعىندا قاجەتتى جەر ۋچاسكەسىن بولەدى جانە ونى بارلىق ينجەنەرلىك ينفراقۇرىلىممەن قامتاماسىز ەتەدى.
تاراپتار بالالار اۋرۋحاناسىنىڭ قۇرىلىسىن جاقىن ارادا باستاۋ نيەتى مەن جوسپارىن راستادى.