قازاقستاننىڭ شەتەلدەردەگى ديپلوماتيالىق وكىلدىكتەرى 2021 جىلعى 10 قاڭتاردا وتەتىن پارلامەنت ءماجىلىسىنىڭ دەپۋتاتتارىن سايلاۋعا دايىندىق جۇمىستارىنا بەلسەندى قاتىسۋدا. وسىعان وراي بىرقاتار شەتەلدىك مەكەمەدە جەرگىلىكتى ساراپشىلار مەن باق وكىلدەرىنە ارنالعان بريفينگتەر ءوتتى, دەپ حابارلايدى Egemen.ءkz سىم ءباسپاسوز قىزمەتىنە سىلتەمە جاساپ.
«گيبريدتى» فورماتتا ۇلىبريتانيانىڭ ساياسي جانە بيزنەس-يستەبليشمەنتى, سونداي-اق بريتاندىق جانە حالىقارالىق باق وكىلدەرى ءۇشىن بريفينگ وتكىزىلدى. قازاقستان ەلشىسى ەرلان ىدىرىسوۆ ءوز سوزىندە ەلىمىزدە ساياسي رەفورمالاردىڭ اۋقىمدى باعدارلاماسى بەلسەندى جۇزەگە اسىرىلىپ جاتقانىن جانە الداعى داۋىس بەرۋ مەملەكەتتىڭ حالىقارالىق ستاندارتتارعا سايكەس سايلاۋ وتكىزۋگە بەيىلدىلىگىن راستاۋعا باعىتتالعانىن اتاپ ءوتتى. ناقتى ايتقاندا, ەلدىڭ ساياسي جۇيەسىن ودان ءارى دەموكراتيالاندىرۋعا جاردەمدەسۋ ءۇشىن ساياسي پارتيالاردى تىركەۋ شەگى ەكى ەسە – 40-تان 20 مىڭ ادامعا دەيىن تومەندەتىلدى, قولدانىستاعى زاڭناماعا ساياسي پارتيالاردان كانديداتتار تىزىمىندە ايەلدەر مەن جاستار ءۇشىن 30 پايىزدىق كۆوتانى قامتاماسىز ەتۋ ءۇشىن وزگەرىستەر ەنگىزىلدى. جينالىس ەركىندىگىن قامتاماسىز ەتۋ بولىگىندە ۇلتتىق زاڭناما ىرىقتاندىرىلدى, ال ولاردى ۇيىمداستىرۋ ءتارتىبى رۇقساتى تۇردەن حابارلاندىرۋ تارتىبىنە وزگەردى.
ۆيلنيۋستە قازاقستان ەلشىسى ۆيكتور تەمىرباەۆ ورتالىق جانە وڭىرلىك باق وكىلدەرى مەن ليتۆا سەيمىنىڭ دەپۋتاتتارى ءۇشىن بريفينگ وتكىزدى, ونىڭ بارىسىندا قاتىسۋشىلاردى سايلاۋعا دايىندىقتىڭ ۇيىمداستىرۋشىلىق كەزەڭدەرىمەن, سونداي-اق قاتىساتىن پارتيالار تۋرالى اقپاراتپەن تانىستىردى. ديپلومات بريفينگكە قاتىسۋشىلاردىڭ نازارىن سايلاۋ ەلدىڭ ودان ءارى ساياسي جاڭعىرۋى اياسىندا «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋدىڭ باستالۋى ارقاسىندا مۇمكىن بولعان جاڭا ساياسي جاعدايدا وتەتىنىنە اۋداردى.
قازاقستاننىڭ رۋمىنياداعى ەلشىسى نۇرباح رۇستەموۆ وسى ەلدىڭ باق-تارىنا ارنالعان بريفينگ بارىسىندا مەملەكەت باسشىسى قاسىم-جومارت توقاەۆتىڭ «قازاقستان جاڭا شىندىقتا: ءىس-قيمىل ۋاقىتى» اتتى حالىققا جولداۋىندا تۇجىرىمدالعان ەلىمىزدىڭ دامۋىنىڭ باسىم باعىتتارىن اتاپ كەتتى.
ديپلومات كوپپارتيالىقتى دامىتۋ جانە قازاقستاننىڭ ساياسي ومىرىنە ازاماتتىق قوعامنىڭ قاتىسۋىن كەڭەيتۋ, پارلامەنتتىك وپپوزيتسيا ينستيتۋتىن قۇرۋ جانە ازاماتتاردىڭ وزدەرىنىڭ ساياسي قۇقىقتارىن تولىق جۇزەگە اسىرۋى ءۇشىن بارىنشا قولايلى جاعداي جاساۋعا باعىتتالعان باسقا دا قادامدار تۋرالى ايتىپ بەردى.