تۇركىستاندا مودۋلدىك جۇقپالى اۋرۋلار گوسپيتالىنىڭ قۇرىلىسى اياقتالۋعا جاقىن. مەملەكەت باسشىسىنىڭ كوروناۆيرۋسقا قارسى شارالاردى كۇشەيتۋگە قاتىستى بەرگەن تاپسىرماسىمەن بوي كوتەرگەن جاڭا ورتالىق زاماناۋي تەحنيكامەن تولىق جابدىقتالعان, دەپ حابارلايدى Egemen.kz
كوروناۆيرۋس ينفەكتسياسىن جۇقتىرعانداردى وقشاۋلاپ, ساپالى مەديتسينالىق قىزمەت كورسەتەتىن ورتالىق 60 كۇندە سالىندى. جەتى مىڭ شارشى مەتر اۋماققا ورنالاسقان ينفەكتسيالىق گوسپيتال 200 ورىنعا لايىقتالعان. ءار توسەك - ورىنعا جاساندى تىنىس الۋ قوندىرعىسى ورناتىلعان. مەديتسينالىق قۇرال-جابدىقتىڭ ءبارى قامتىلعان. جانساقتاۋ ءبولىمى, زەرتحاناسى بار. ەمدەلۋشىلەردىڭ دەنساۋلىعىن ارنايى بىلەزىكتەر ارقىلى باقىلاۋعا بولادى.
سونداي-اق تۇركىستاندا 8 قاباتتى كەشەندى ەمدەۋ ورتالىعىنىڭ قۇرىلىسى جۇرگىزىلۋدە. اۋماعى 100 مىڭ شارشى مەترگە جۋىق ەمحانا قۇرىلىسى شىلدە ايىندا باستالعان. 630 ورىندىق كوپسالالى اۋرۋحانانىڭ قۇرىلىسى مەملەكەت - جەكەمەنشىك ارىپتەستىگى شەڭبەرىندە جۇزەگە اسىرىلۋدا. «Sembol construction» تۇرىك كومپانياسىنىڭ قارجىلاندىرۋىمەن سالىنىپ جاتقان كەشەندى ەمدەۋ ورتالىعى كەلەر جىلى پايدالانۋعا بەرىلەدى دەپ جوسپارلانعان. ورتالىق تولىقتاي زاماناۋي مەديتسينالىق قۇرال-جابدىقتارمەن قامتاماسىز ەتىلمەك. قۇرىلىس الاڭدارىندا بولعان وبلىس اكىمى ومىرزاق شوكەەۆ مەردىگەرلەرگە نىساندى كەستەگە سايكەس اياقتاۋدى مىندەتتەپ, ساپاعا باسا نازار اۋدارۋدى ەسكەرتتى.
تۇركىستان وبلىسى