كۋۆەيت مەملەكەتىنىڭ قازاقستانداعى ەلشىلىگى مەن ازيا مۇسىلماندارى كوميتەتىنىڭ ەلىمىزدەگى وكىلدىگى وبلىستىق «تۇركىستان-قوجا احمەت ياسساۋي» مەشىتىنە 2 مىڭ دانا قۇران تارتۋ ەتتى. قاسيەتتى كىتاپ اۋدان, قالا, اۋىل مەشىتتەرىنە, مەدرەسە-كوللەدجدەرگە, كىتاپحانالارعا تاراتىلدى, دەپ حابارلايدى Egemen.kz
وبلىس يمامى مۇسابەك اقتامبەردى كۋۆەيت مەملەكەتىنىڭ توتەنشە جانە وكىلەتتى ەلشىسى تارەك ابدۋللا ءال-فاراج مىرزا مەن ازيا مۇسىلماندارى كوميتەتىنىڭ وكىلدەرىنە ريزاشىلىعىن ءبىلدىردى.
«قۇراننىڭ ماعىناسىن تۇسىنەتىن ادامنىڭ اللانىڭ ەسكەرتۋلەرىن وقىعاندا كوزىنە جاس الماۋى مۇمكىن ەمەس. ەلىمىزدە ءدىن اتىن جامىلعان اعىمدارعا ەرگەندەر قۇراننىڭ ماعىناسىن بىلمەگەندىكتەن اداسىپ ءجۇر. قۇراننىڭ ءتىلىن بىلگەنىمەن, ماعىناسىن تۇسىنبەي قيىندىققا دۋشار بولعان», دەدى قمدب تۇركىستان وبلىسى بويىنشا زەكەت وكىلى ەركىن پولاتوۆ.
ۇستازدار قۇراننىڭ اۋدارماسىن كوپ وقىعان ادامدار سۇرەلەردى وڭاي جاتتايتىنىن ايتادى. ءارى سوزدىك قور جيناۋعا جول اشادى. ايتا كەتەيىك, كۋۆەيت ەلشىلىگى مەن ازيا مۇسىلماندارى كوميتەتى تاراپىنان جىلىنا بىرنەشە رەت قايىرىمدىلىق وتكىزىلەدى. سونداي-اق, ىلكىمدى جوبالار جۇزەگە اسىرىلىپ كەلەدى.
تۇركىستان وبلىسى