قوعام بىرلىگى – باعا جەتپەس بايلىق

قاي حالىقتىڭ دا, قاي مەملەكەتتىڭ دە نەگىزگى مەرەكەسى – ۇلتتىق تاۋەلسىزدىك كۇنى. ەل پرەزيدەنتى قاسىم-جومارت توقاەۆ وسى مەرەكەگە وراي ەل ازاماتتارىن ماراپاتتاۋ راسىمىندە تاۋەلسىزدىكتەن كەيىنگى تاريحي وقي­عالارعا توقتالىپ ءوتتى.

پرەزيدەنت ايتقانداي, تاۋەلسىزدىك جىلدارىندا ەلىمىزدە اتقارىلعان جۇمىس وتە كوپ. ولاردىڭ بارلىعى ەل تاريحىندا التىن ارىپپەن جازىلىپ قالدى. اسىرەسە, ەلدىگىمىز سىنالعان ساتتەردە حالقىمىزدىڭ بىرلىك پەن ىنتىماقتى تۋ ەتىپ, جۇمىلا ەڭبەك ەتكەنىن ەرەكشە اتاپ وتۋگە بولادى.

تاۋەلسىزدىگىمىزدىڭ 29 جىلىن تاريح ەنشى­سىنە قالدىرىپ, ەلىمىز ەگەمەندىگىنىڭ وتى­زىن­­شى جىلىن باستاعالى وتىرمىز. وسى ارا­­لىقتا ىرگەلى ەلگە اينالىپ, مەملەكەت­تىلى­گىمىز ورنىقتى. زامان تالابىنا ساي مەملەكەت قۇردىق, ونىڭ ءتيىمدى باسقارۋ اپپاراتىن قا­لىپ­تاستىردىق. وسى جۇمىستاردىڭ باسىن­دا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ تۇردى. ەندى بۇل جۇمىستى قاسىم-جومارت توقاەۆ جال­عاس­تىرىپ, ەلىمىزدى العا باستاپ كەلەدى. ەلى­مىزدىڭ الدىندا تۇرعان مىندەتتەر وتە اۋقىمدى. ولاردى ەل-جۇرت بولىپ ەڭسەرۋىمىز كەرەك.

پرەزيدەنت ايتىپ وتكەندەي, حالىق تۇر­مىسىن جاقسارتۋ, ازاماتتاردىڭ ءال-اۋقاتىن ارتتىرۋ, ءالجۋاز توپتارعا كومەك كورسەتۋ جۇمىستارى الداعى ۋاقىتتا جۇيەلى تۇردە جۇزەگە اساتىن بولادى. ەلىمىزدىڭ الدىندا ماقساتتى باعدار تۇر. ال سول ماقساتقا جەتۋ ءۇشىن بەيبىت كۇن كەرەك, حالقىمىز ءبىر ادامداي جۇمىلىپ ەڭبەك ەتۋى كەرەك.

قازىرگى تاڭدا الەمدى جايلاعان پاندە­ميا­عا قارسى كۇرەس – كۇن تارتىبىندە تۇرعان باستى ماسەلەلەردىڭ ءبىرى بولىپ وتىر. وسى تۇرعىدان ايتساق, مەملەكەت پەن قوعام بىرلەسە جۇمىس ىستەپ, قيىندىقتى ەڭسەرىپ كەلەدى. ەل پرەزيدەنتى قاسىم-جومارت توقاەۆتىڭ ۇيىمداستىرۋىمەن ىندەتكە قارسى كۇرەس جۇمىستارى كۇن وتكەن سايىن جاندانىپ, حالىقتى ءدارى-دارمەكپەن, قۇرال-جابدىقتارمەن قامتاماسىز ەتۋ ءىسى ءبىر جۇيەگە ءتۇستى.

وسى ارادا ايتا كەتەيىن, دارىگەرلەر مەن قۇقىق قورعاۋ سالاسى قىزمەتكەرلەرىنىڭ اتقارعان جۇمىستارى ۇشان-تەڭىز. ولار باستارىن ولىمگە تىگە ءجۇرىپ, حالىق ءۇشىن قىزمەت ەتۋدە. باسقالاردى قۇتقارامىن دەپ ءومىرىن قيعاندار دا جەتەرلىك. سوڭعى جىلدارى ەلىمىزدە پاندەميادان بولەك قيىن-قىستاۋ جاعداي كوپ بولدى. ارىستاعى جارىلىس, ماقتاارالداعى سۋ تاسقىنى كەزىندە مەملەكەت باسشىسى سابىرمەن تياناقتى, جان-جاقتى جۇمىستار جۇرگىزە ءبىلدى. سونىڭ بارلىعى ءوزىنىڭ وڭ ناتيجەسىن بەردى.

وسى رەتتە باي تاجىريبەسىمەن, تۇيگە­نىمەن ەلىمىزدىڭ ارداگەرلەرى دە يگى ىستەرگە اتسالىسىپ كەلەدى. ەل ارداگەرلەرى باعا جەتپەس بايلىق. ولاردىڭ تاجىريبەسى قاشاندا قاجەت. قازىرگى قيىن-قىستاۋ كەزەڭدە حا­لىقتى سابىرعا شاقىرىپ, بىلگەنىمەن ءبولىسىپ, كومەك كورسەتۋدە, ەرتەڭگە ۇمىتپەن قاراۋعا ۇندەۋدە. قوعام بىرلىگى – باعا جەتپەس بايلىق. الداعى كۇندەرگە ءۇمىتىمىز زور. 

ومىرزاق وزعانباەۆ,

تاريح عىلىمدارىنىڭ دوكتورى, پروفەسسور,

«ارداگەرلەر ۇيىمى» ورتالىق كەڭەسى توراعاسىنىڭ ءبىرىنشى ورىنباسارى