الماتى قالاسىندا حالىقارالىق ۆاليۋتا قورىنىڭ وڭىرلىك ورتالىعى جۇمىس ىستەيدى. حالىقارالىق ۆاليۋتا قورىنىڭ باسقارۋشى ديرەكتورى كريستاليانا گەورگيەۆا مەن ۇلتتىق بانك توراعاسى ەربولات دوساەۆ كاۆكاز, ورتالىق ازيا جانە موڭعوليانىڭ پوتەنتسيالىن دامىتۋ وڭىرلىك ورتالىعىن قولداۋ بويىنشا كەلىسىمگە كەلىپ, وسىنداي بايلامعا ۋاعدالاسقان. بۇل جايلى ۇلتتىق بانكتىڭ ءباسپاسوز قىزمەتى حاباردارلادى, دەپ جازادى Egemen.kz
الەمدە ءدال وسىنداي 16 ورتالىق جۇمىس ىستەيدى. سوڭعىسى 2018 جىلى قىتايدا اشىلعان. الماتىداعى ورتالىق – وڭىردەگى العاشقى, ال حالىقارالىق ۆاليۋتا قورىنىڭ ادامي كاپيتالدى دامىتۋ جونىندەگى 17-ورتالىق بولماق. مۇنداي ورتالىق اشۋداعى ماقسات – ءوڭىر پوتەنتسيالىن دامىتۋدى جۇزەگە اسىرۋ جانە ۇيلەستىرۋ. بۇل ماقساتتا 8 ەلمەن (ارمەنيا, ءازىربايجان, گرۋزيا, قىرعىز رەسپۋبليكاسى, موڭعوليا, تاجىكستان, تۇركىمەنستان جانە وزبەكستان) جانە ءارتۇرلى قارجى ينستيتۋتتارىمەن تەرەڭ بايلانىس ورنايدى.
«وڭىرلىك ورتالىق ءوڭىردىڭ ماكروەكونوميكا, قارجى, اقشا-قاراجات ساياساتى, قارجى سەكتورىنداعى قاداعالاۋ جانە باقىلاۋ, ستاتيستيكا, قۇرىلىمدىق رەفورمالار جاساۋ ماسەلەلەرىنە باسىمدىق بەرەدى. اتالعان سەكتورلاردى دامىتۋ بويىنشا تەحنيكالىق كومەك ۇسىنىپ, workshop (وقۋ-تاجىريبە) پەن سەمينارلار وتكىزەدى. ورتالىقتىڭ قۇرىلۋى, بۇل – ايماقتىڭ كاسىبي دامۋىنا جانە جالپى ىنتىماقتاستىققا نەگىز بولاتىن ساپالى ادامي كاپيتالعا سالىنعان ينۆەستيتسيا. ورتالىق جۇمىسى كاسىبي تاجىريبە الماسۋدى تەرەڭدەتۋگە جانە وڭىرلىك سەرىكتەستىكتى نىعايتۋعا ىقپال ەتەدى» دەلىنگەن ۇلتتىق بانك حابارلاماسىندا.
ەسكە سالساق, حالىقارالىق ۆاليۋتا قورى قازاقستاننان وڭىرلىك ورتالىق اشۋ تۋرالى شەشىمدى قازاقستان, وزبەكستان جانە گرۋزيا ەلدەرىنىڭ ءوتىنىشىن قاراستىرعاننان كەيىن 2019 جىلدىڭ قازان ايىندا قابىلدادى.
الماتى