بيىلعى جىلى قر مەملەكەتتىك ءانۇرانىنىڭ اۆتورى, قازاق ءۆالسىنىڭ كورولى ءشامشى قالداياقوۆتىڭ تۋعانىنا 90 جىل تولادى. قازاق دالاسىن ءان بەسىگىندە تەربەتكەن دالا دارىنىنىڭ مەرەيتويى تۇركىستان وبلىسىندا كەڭ كولەمدە اتاپ وتىلۋدە, دەپ حابارلايدى Egemen.kz.
وسىعان وراي, ءشامشى الەمىن كەڭىنەن ناسيحاتتاۋ, زامانداستارى مەن ونەردەگى ءىزباسارلارىن كومپوزيتوردىڭ تۋعان توپىراعىنا شاقىرۋ ماقساتىندا الماتى قالاسىنان جولعا شىققان رەسپۋبليكالىق زيالى قاۋىم وكىلدەرى مىنگەن «ش.قالداياقوۆ» پوەزدى توعىز جولدىڭ تورابى سانالعان ارىس قالاسىنا ايالدادى. قۇرامىندا مادەنيەت جانە ونەر قايراتكەرلەرى, تانىمال جۋرناليستەر, ءشامشىنىڭ زامانداستارى مەن تۋىستارى بار رۋحاني كەرۋەن الدىمەن ارىس قالاسىنىڭ تەمىر جول ۆوكزالىنىڭ جۇمىسىمەن تانىستى.
قوناقتاردى ارىس قالاسىنىڭ اكىمى مۇرات قادىربەك كۇتىپ الىپ, ءشامشى انگە قوسقان ارىس جاعاسىنداعى اجارلى قالانىڭ بۇگىنگى كەلبەتىمەن تانىستىردى.
سودان كەيىن كوپەن امىربەك, تىلەۋبەردى بيناش, اسەلحان قالىبەكوۆا قازىبەك يسا, قۇرمانبەك وڭالبەك, الىبەك شەگەباي سىندى ونەر مايتالماندارى باستاعان دەلەگاتسيا ءشامشىنىڭ تۋعان اۋىلىنا اتتاندى. قوناقتار الدىمەن ش.قالداياقوۆ اۋىلىنداعى كومپوزيتور ەسكەرتكىشىنە گۇل شوقتارىن قويۋ راسىمىنە قاتىسىپ, «وتىرار» حالىق تەاترى ارتىستەرىنىڭ ورىنداۋىنداعى ء«شامشى» قويىلىمىن تاماشالادى. تاياۋدا عانا كومپوزيتوردىڭ مەرەيتويىنا وراي اشىلعان ش.قالداياقوۆتىڭ مۋزەيىمەن تانىسقان قوناقتار ءشامشى جايلى ەستەلىكتەرى مەن اسەرلى اڭگىمەلەرىمەن ءبولىستى.
ارىستان باب كەسەنەسىنە زيارات جاساعان دەلەگاتسيا وكىلدەرى ش.قالداياقوۆ ەسكەرتكىشىنىڭ اشىلۋ سالتاناتىنا قاتىسۋ ءۇشىن تۇركىستان قالاسىنا اتتاندى.