2018 جىلى «ماكينسك قۇس فابريكاسىنا» ەۋروپانىڭ قايتا قۇرۋ جانە دامۋ بانكى, «بايتەرەك» xولدينگىنىڭ ەنشىلەس ۇيىمدارى 35 ميلليارد تەڭگە ينۆەستيتسيا قۇيعان بولاتىن. قۇس فابريكاسى جىلىنا 25 مىڭ توننا قۇس ەتىن وندىرسە, ەندى ءونىم كولەمىن ەكى ەسەگە ۇلعايتپاق, دەپ حابارلايدى Egemen.kz.
قۇس فابريكاسى دامۋىنىڭ ءۇش كەزەڭى مەجەلەندى. نىسان «ايتاس.كز» حولدينگىنىڭ قۇرامىنا ەنەدى. حولدينگ اقمولا وبلىسىمەن قاتار, شىعىس قازاقستاندا دا قۇس وسىرەدى. الماتى وبلىسىندا برويلەر جۇمىرتقاسىن ءوندىرۋ جوسپارلانعان. وسىلايشا, وتاندىق كاسىپورىن قۇس ەتى ءوندىرىسىنىڭ تولىق تسيكلىنە قول جەتكىزۋدى كوزدەپ وتىر.
«زاۋىتتى دامىتۋدىڭ ەكىنشى كەزەڭى جۇزەگە اسىرىلدى. بۇل ءونىم كولەمىن 25 مىڭ توننادان, 56 مىڭ تونناعا جەتكىزۋگە مۇمكىندىك بەرەدى. ەكىنشى كەزەڭى اياسىندا 4 برويلەر ءوسىرۋ كەشەنى سالىندى. ونىڭ ارقايسىسىندا 12 كورپۋس بار. ءار كورپۋستىڭ اۋماعى 2 مىڭ شارشى مەتر», دەيدى ماكينسك قۇس فابريكاسىنىڭ ديرەكتورى ەۆگەني پروسكۋرين.
كاسىپورىن قۋاتىنىڭ ەسەلەنۋىنە وراي قۇس ازىعىن ازىرلەۋ تسەحى, قۇس ەتىن وڭدەۋ ورنى قايتا جابدىقتالدى. 570 جاڭا جۇمىس ورنى اشىلدى. وسىلايشا, جۇمىسشىلاردىڭ جالپى سانى مىڭ جارىمعا جەتتى. قۇس فابريكاسىنىڭ ەكىنشى كەزەڭىن ىسكە اسىرۋعا 13,7 ملرد تەڭگە ينۆەستيتسيا جۇمسالعان. ونىڭ 11 ملرد تەڭگەسى «قازاقستاننىڭ دامۋ بانكى» ۇسىنعان نەسيە.
ورتالىق ازياداعى ەڭ ءىرى قۇس فابريكاسى ءۇشىنشى كەزەڭىندە ءونىم كولەمىن 100 مىڭ تونناعا جەتكىزۋدى جوسپارلانعان. قازىر ەلىمىزدەگى كاسىپورىندار قۇس ەتىمەن ىشكى نارىقتىڭ جارتىسىن قامتاماسىز ەتىپ وتىر. ال قالعانى سىرتتان كەلەدى. ماكينسك قۇس فابريكاسى تولىق قۋاتتىلىعىنا جەتكەندە, نارىقتاعى وتاندىق ءونىمنىڭ ۇلەسى 80 پروتسەنتكە وسپەك.