تاۋەلسىزدىك مەرەكەسى قارساڭىندا ءاربىر سالادا ءوز مىندەتىن ءمىنسىز اتقارۋعا ۇمتىلىپ جۇرگەن بىرقاتار تۇلعالى ازاماتتارعا قالا اكىمى باقىتجان ساعىنتاەۆ مەملەكەت باسشىسىنىڭ اتىنان مەملەكەتتىك ماراپاتتارىن تاپسىردى, دەپ حابارلايدى Egemen.kz.
جوعارى ناگرادالارمەن ماراپاتتالعانداردىڭ اراسىندا دارىگەرلەر, مۇعالىمدەر, قوعام قايراتكەرلەرى, شىعارماشىلىق جانە عىلىمي زيالى قاۋىم وكىلدەرى بار. تاۋەلسىزدىك كۇنىنە وراي الماتى قالاسىنىڭ بارلىعى 76 تۇرعىنى ماراپاتتارعا يە بولدى.
سالتاناتتى جيىنعا قاتىسۋشىلار الدىندا سويلەگەن سوزىندە الماتى قالاسىنىڭ اكىمى باقىتجان ساعىنتاەۆ تاۋەلسىزدىكتىڭ قۇندى مەرەكە ەكەندىگىنە توقتالا كەلە: «بۇگىنگى قازاقستان – تابىستى, قارقىندى دامىپ كەلە جاتقان مەملەكەت, ال ءبىزدىڭ قالامىز الماتى – تاۋەلسىزدىكتىڭ التىن بەسىگى. تاۋەلسىزدىك جىلناماسىندا الماتىلىقتاردىڭ دا ۇلەسى بار ەكەنىن ماقتانىشپەن ايتا الامىز. وسى ۋاقىت ىشىندە ءبىز ماڭىزدى جەتىستىكتەرگە قول جەتكىزدىك. الماتى بيزنەس پەن جەكە كاپيتال شوعىرلانعان قالاعا اينالىپ, ەل ەكونوميكاسىنىڭ بەستەن ءبىر بولىگىن جانە رەسپۋبليكالىق بيۋدجەتتىڭ ۇشتەن ءبىر بولىگىن قۇرادى. وسى جەتىستىكتەردىڭ بارلىعى – مەملەكەت جانە قوعام قايراتكەرلەرىنىڭ, عىلىم مەن ءبىلىم, مادەنيەت جانە سپورت, دەنساۋلىق ساقتاۋ, ازاماتتىق قوعام, مەملەكەتتىك قىزمەتشىلەر جانە الەۋمەتتىك قورعاۋ, ەنەرگەتيكا, كوممۋنالدىق شارۋاشىلىق, كاسىپكەرلىك وكىلدەرىنىڭ ەڭبەگى. بۇگىن سىزدەردىڭ ەلىمىز بەن مەگاپوليستىڭ دامۋىنا قوسقان ۇلەستەرىڭىز جوعارى مەملەكەتتىك ناگرادالارمەن لايىقتى تۇردە ماراپاتتالدى», دەدى.
سونىمەن II دارەجەلى «دوستىق» وردەنىمەن قازاقستان-فرانتسيا ىسكەرلىك كەڭەسىنىڭ تەڭ توراعاسى ا. كارىبجانوۆ ماراپاتتالدى.
«قۇرمەت» وردەنىنە 11 الماتىلىق يە بولدى, ولاردىڭ اراسىندا №5 ەمحانا باس دارىگەرىنىڭ ورىنباسارى ا.ابدراحمانوۆا, ەڭبەك ارداگەرى ز.احمەتوۆا, №169 مەكتەپ-ليتسەيدىڭ ديرەكتورى گ.بەكەنوۆا, «قازاق ونكولوگيا جانە راديولوگيا عىلىمي-زەرتتەۋ ينستيتۋتى» اق ديرەكتورى د.قايداروۆا, «قازاق ادەبيەتى» گازەتىنىڭ باس رەداكتورى داۋرەت قۋاتوۆ, كومپوزيتور,«قازاق اۆتورلار قوعامى» رقب توراعاسى ب.قىدىربەك جانە باسقالارى بار.
III دارەجەلى «ەڭبەك داڭقى» وردەنىمەن «الماتى ەلەكتروترانس» جشس تروللەيبۋس جۇرگىزۋشىسى ر. قالمۇحامبەتوۆتىڭ, «الماتىمەتروقۇرىلىس» اق تاۋ-كەن شەبەرى ت.قوڭىراتوۆتىڭ, «كونكريت پروداكتس» جشس بەتون بۇيىمدارى تسەحىنىڭ شەبەرى ا.ءسينيشيننىڭ ەڭبەكتەرى اتالىپ ءوتىلدى.
بىرقاتار قالا تۇرعىندارى قاجىرلى ەڭبەكتەرىنىڭ ارقاسىندا «ەرەن ەڭبەگى ءۇشىن» مەدالىمەن ماراپاتتالدى. ولاردىڭ اراسىندا №83 گيمنازيانىڭ فيزيكا ءپانىنىڭ مۇعالىمى ل.اراتاي, «الماتىنىڭ ەلەكتروششيت زاۋىتى» جشس ديرەكتورى م.اۋمولداەۆ, «بالالار مەن جاسوسپىرىمدەردىڭ كەشەندى №5 مامانداندىرىلعان سپورت-تەحنيكالىق مەكتەبى» مكقك اعا جاتتىقتىرۋشىسى ك.ەششەنكو بار.
«شاپاعات» مەدالىمەن «پەريناتولوگيا جانە بالالار كارديوحيرۋرگياسى ورتالىعى» مقك ديرەكتورى گ. بودىكوۆتىڭ, «ورتالىق قالالىق كلينيكالىق اۋرۋحانا» مقك-نىڭ سوماتيكا ءبولىمىنىڭ اعا مەدبيكەسى ر. وماروۆانىڭ, «№1 قالالىق پەرزەنتحانا» مقك-نىڭ اكۋشەر-گينەكولوگى پ.سادىكوۆانىڭ, «قازاق ونكولوگيا جانە راديولوگيا عىلىمي-زەرتتەۋ ينستيتۋتى» اق ءبولىم باسشىسى ي.حۋساينوۆانىڭ جانە باسقالارىنىڭ ەڭبەكتەرى اتالىپ ءوتتى.
بۇلاردان وزگە, ەرىكتىلەر, مەديتسينالىق-كوممۋنالدىق مەكەمەلەردىڭ قىزمەتكەرلەرى قازاقستان رەسپۋبليكاسىنىڭ جانە مەملەكەت باسشىسىنىڭ قۇرمەت گراموتالارىمەن ماراپاتتالدى.