قوستاناي وبلىسىنىڭ جانكەلدين اۋدانىنا قاراستى اقكول اۋىلىندا 29 جاستاعى ايەلگە تاپا-تال تۇستە قاسقىر شاۋىپ, جاراقاتتاپ كەتتى, دەپ حابارلايدى Egemen.kz.
اۋىل تۇرعىندارىنىڭ سوزىنشە, ءتۇز تاعىسى اقكولدىڭ ىرگەسىندەگى سىزاي مەكەنىندە وتىرعان مالشىنىڭ قىستاعىنا كەلىپتى. قاسقىر سويىلعان مالدىڭ ىشەك-قارنىن اساپ جاتقاندا, ۇيدەن شىققان ايەلگە تاپ بەرىپ, قارىن تۇسىن جاراقاتتاپتى. ارتىنشا سالت جەتكەن كۇيەۋى تۇرا قۋعاندا, جىرتقىش اتتى ادامنىڭ وزىنە قارسى شاپقان كورىنەدى.
بۇل اقپاراتتى وبلىستىق دەنساۋلىق ساقتاۋ باسقارماسى دا راستادى.
«1991 جىلى تۋعان ايەل جانگەلدين اۋداندىق ورتالىقتاندىرىلعان اۋرۋحاناسىنا جاتقىزىلدى. قازىر دارىگەرلەردىڭ باقىلاۋىندا. جاعدايى قاناعاتتانارلىق. حيرۋرگ مامان جۇرگىزگەن ەمدەۋ شاراسىنان كەيىن قوسىمشا كومەكتى قاجەت ەتپەيدى. ناۋقاسقا انتيرابيالىق, ياعني قۇتىرماعا قارسى يممۋنيتەتتى كۇشەيتەتىن ۆاكتسينا ەگىلدى», دەدى وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى كسەنيا جىلقىباەۆا.