تاياۋدا الماتى قالاسىنىڭ اكىمى باقىتجان ساعىنتاەۆ iAzamat ءموبيلدى ينتەراكتيۆتى قوسىمشاسىن قۇرۋ تۋرالى باستاما كوتەرگەن بولاتىن. كۇنى كەشە اتالعان قوسىمشانىڭ بەتا-نۇسقاسى ىسكە قوسىلدى, دەپ حابارلايدى Egemen.kz
وڭىرلىك كوممۋنيكاتسيالار قىزمەتى الاڭىندا وتكەن ونلاين-بريفينگ بارىسىندا قوسىمشا تۋرالى جانە كەلەسى جىلى قانداي وزگەرىستەر كۇتىلەتىنىن «الماتى قالاسىن دامىتۋ ورتالىعى» قوعامدىق كوممۋنيكاتسيالار دەپارتامەنتىنىڭ ديرەكتورى ءاليا جاقسالىقوۆا تولىعىراق ايتىپ بەردى.
ازىرلەۋشىلەر اتاپ وتكەندەي, iAzamat قوسىمشاسى تۇرعىنداردى الماتىنىڭ جاعىمدى وزگەرىسىنە, ونىڭ ىشىندە: قوعامدىق كولىك, جولداردى جوندەۋ, تكش, اباتتاندىرۋ, كوگالداندىرۋ, كوشەلەردى تازالاۋ, جارىقتاندىرۋ جانە ت. ب. باعىتتار بويىنشا تارتۋعا باعىتتالعان.
ءموبيلدى قوسىمشانىڭ فۋنكتسيونالى قالا تۇرعىندارىنىڭ قالا بيلىگىمەن ديالوگ جۇرگىزۋگە ارنالعان الاڭىن بىلدىرەدى. قالا تۇرعىندارى وسى نەمەسە باسقا جوبا تۋرالى ءوز پىكىرلەرىن ءبىلدىرىپ, تالقىلاي الادى, سونداي-اق ءوز ۇسىنىستارىن جولداۋعا دا مۇمكىندىكتەرى بار.
باستى ماقسات – «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ جانە بيلىك پەن قالا تۇرعىندارى اراسىندا كەدەرگىسىز ديالوگ قۇرۋ. سونىمەن بىرگە قالاداعى ەلەۋلى جاڭالىقتار مەن ءىس-شارالار تۋرالى جەدەل حابارلاۋ, جەرگىلىكتى اتقارۋشى ورگانداردىڭ ەسەپ بەرۋى مەن اشىقتىعى دا اتالعان جۇيە ارقىلى وڭتايلانا تۇسپەك.
قوسىمشا Open Almaty جۇيەسىندە قۇرىلعان. قوعامدىق قابىلداۋ وپەراتورلارى بارلىق وتىنىشتەردى كورىپ, ولاردى شەشۋ بويىنشا جەدەل شارالار قابىلداي الادى. جاقىن ارادا تۇرعىندار مەملەكەتتىك ورگانداردىڭ وسى قوسىمشا ارقىلى ولارعا بەرگەن جاۋابىن باعالاي الادى.
«قاڭتار ايىنىڭ سوڭىندا ءبىز پروبلەما تۋرالى حابارلاۋعا بولاتىن جاڭا فۋنكتسيانى ىسكە قوسامىز, وندا تۇرعىندارعا ماسەلەنىڭ فوتوسۋرەتىن, بەينەسىن, ناقتى گەولوكاتسياسىن تىركەۋ ءۇشىن بىرنەشە رەت باسۋ جەتكىلىكتى بولادى. قازىر بىزدە ءدال وسى باعىتتا جۇمىس جۇرگىزىلۋدە. كەلەسى جىلى دا ءبىز مەملەكەتتىك ورگانداردىڭ جاۋاپتارىن باعالاۋ جۇيەسىن ەنگىزەتىن بولامىز. بۇل جاۋاپتاردىڭ ساپاسىن ارتتىراتىن جاقسى قۇرال بولادى دەپ ەسەپتەيمىن», دەپ اتاپ ءوتتى ا.جاقسالىقوۆا.
الماتىلىقتار قوسىمشانىڭ ينتەرفەيسى مەن فۋنكتسيونالىن جەتىلدىرۋ بويىنشا ءوز يدەيالارى مەن تىلەكتەرىن iazamat@almatydc.kz. ەلەكتروندىق مەكەن-جايىنا جولداي الادى.