بۋراباي كۋرورتىندا قازىرگى ۋاقىتتا قازاقستاندا تەڭدەسى جوق جاڭا ەكسپوزيتسيالىق كەشەن اشىلادى. قۇرىلىس 2019 جىلدىڭ ماۋسىم ايىندا باستالعان كەشەن اعىمداعى جىلدىڭ جەلتوقسان ايىندا جاڭا مادەني-تۋريستىك نىسان رەتىندە كەلۋشىلەرگە ءوز ەسىگىن ايقارا اشادى, دەپ حابارلايدى Egemen.kz
ەكسپوزيتسيالىق كەشەندە ەلىمىزدىڭ تاريحى باياندالاتىن بىرنەشە زالدار, اتتراكتسيوندار بار. كەشەن بويىنشا ساياحات «قازاقستاندىق ارمان» دەپ اتالاتىن لوببيدەن باستالادى. اسەرلى اتتراكتسيونداردىڭ ءبىرى – «سامۇرىق قۇسىنىڭ ۇشۋى». نەبارى 15 مينۋتتىڭ ىشىندە ۇلى ەلىمىزدىڭ بارلىق كيەلى, كوركەم جەرلەرىن ارالاپ شىعۋعا بولادى. مۋزەيدى قۇرۋشىلار تۋرا ماعىنادا قازاقستاننىڭ وتكەنىن, بۇگىنى مەن بولاشاعىن بىرىكتىردى. ول تاريحي ورىندا ابىلاي حان الاڭىندا ورنالاسقان.
سونداي-اق, ەكسپوزيتسيالىق كەشەندە قازاقستانداعى جالعىز «ماڭگىلىك ەل» مۋلتيمەديالىق ءومىر اعاشى نەمەسە حالىق ايتقانداي, «شەجىرە» ءوسىپ كەلەدى. وسى اعاشتىڭ كومەگىمەن ءار قازاق ءوزىنىڭ وتباسىن, ءجۇزىن, تاريحىن, ياعني, شىققان تەگىن بىلە الادى. زال اقپاراتتىق جانە تانىمدىق سيپاتتا بولادى. مۇنىڭ ءبارىن جارىق شوۋى كورسەتەدى. ەكسپوزيتسيالىق كەشەن بويىنشا ساياحات كەزىندە مۋلتيمەديالىق تەحنولوگيالاردى قولدانا وتىرىپ, ءار كەلۋشى زالدان-زالعا مۋلتيمەديالىق كەڭىستىككە, تاريحقا كوبىرەك ەنىپ, قىزىعۋشىلىعى ارتادى. اسىرەسە, بۇل جاس ۇرپاق ءۇشىن ماڭىزدى. ساياحاتتىڭ سوڭىندا ءسىز قاتتى قۋاناسىز جانە تاڭعاجايىپ كورىنىستىڭ كەرەمەت اسەرىنە بولەنەسىز.
بۇل جوبانىڭ باستى ماقساتى – قازاقستاننىڭ تاريحي مۇراسىن ساقتاۋ. زاماناۋي تەحنولوگيالار ارقىلى نەگىزگى اقپاراتتى ۇسىنۋ جاس ۇرپاقتىڭ تاريحقا دەگەن قىزىعۋشىلىعىن ەداۋىر ارتتىرادى. سونداي-اق, جاڭا تۋريستىك ورىن بۋراباي كۋرورتىنا كەلەتىن ءبىزدىڭ ەلىمىزدىڭ تۇرعىندارى مەن قوناقتارىنىڭ قىزىعۋشىلىعىن تۋعىزادى دەپ سەنىممەن ايتۋعا بولادى. ءبىزدىڭ ەلىمىز ءۇشىن بۇل شىنىمەن, مۇراجاي سالاسىنداعى ۇلكەن جەتىستىك. دەمەك, وسى ۇلكەن كەشەننىڭ اشىلۋىن اسىعا كۇتەمىز.
اقمولا وبلىسى,
بۋراباي اۋدانى.