قازىرگى ۋاقىتتا الەمنىڭ دامىعان ەلدەرى اسكەرلەرگە روبوتتاندىرىلعان جۇيەلەردى ەنگىزۋگە كوپ كوڭىل بولەدى. اسكەري روبوتتار قازاقستاننىڭ قارۋلى كۇشتەرىندە دە كەڭىنەن قولدانىلادى.
2015 جىلدان باستاپ, قر قارۋلى كۇشتەرىن جاراقتاندىرۋعا جەرۇستى, تەڭىز جانە اۋە ماقساتىنداعى روبوتوتەحنيكالىق قۇرالدار كەلىپ تۇسۋدە.
الەمدىك ترەندتەردى زەردەلەۋ جانە جاڭا تەحنولوگيالاردى ىلگەرىلەتۋ ءۇشىن 2019 جىلى باس شتابتا روبوتوتەحنيكالىق جۇيەلەردى دامىتۋ جانە ولاردى قولدانۋ باسقارماسى قۇرىلدى. باسقارما ماماندارى جاڭا تەحنولوگيالاردى ەنگىزۋ جانە قولدانۋ بويىنشا جوسپارلى جۇمىس جۇرگىزۋدە. ولار وقۋ ورىندارىمەن جانە قورعانىس-ونەركاسىپتىك كەشەنىمەن ءوزارا تىعىز ءىس-قيمىل جاسايدى, عىلىمي كاسىپورىندارمەن بىرلەسىپ روبوتتاردىڭ تاجىريبەلىك ۇلگىلەرىن ازىرلەۋگە قاتىسادى.
بۇگىندە ەل اسكەرىنىڭ قارۋ-جاراعىندا روبوتتاردىڭ جەردەگى جانە تەڭىزدەگى ەكى ءتۇرى بار. Eye Drive تەلەباسقارىلاتىن شاعىن روبوتتىڭ سالماعى ءۇش كەلى. ول ناشار قيىلىسقان جەردە, قالالىق ينفراقۇرىلىم مەن ءۇي-جايلاردا نىساندار مەن اۋماقتاردى بەينە جانە اۋديوبارلاۋدى جۇرگىزۋگە مۇمكىندىك بەرەدى. روبوتتى عيماراتقا جىبەرۋ ارقىلى, ول سول جەردەن اقپاراتتى 50 مەترگە دەيىن قاشىقتىقتاعى وپەراتوردىڭ پلانشەتىنە جەتكىزەدى. اشىق جەردە شاعىن روبوتتىڭ راديۋسى 300 مەتردەن اسادى.
جەڭىل كلاستى ءموبيلدى روبوتتاندىرىلعان tEODor كەشەنى ميناسىزداندىرۋدان قاۋىپتى جۇمىستاردى جۇرگىزۋ كەزىندە پايدالانىلادى. ول جارىلعىش قۇرىلعىنى انىقتاپ, وپەراتوردىڭ باسقارۋىمەن ونى باسقا جەرگە كوشىرۋ ءۇشىن ارنايى كونتەينەرگە سالادى. tEODor ءجۇز كيلوگرامعا دەيىن سالماقتى كوتەرىپ, ونى 200 مەتردەن ەكى شاقىرىمعا دەيىن جىلجىتۋعا قابىلەتتى.
مينا-ترالدى كورابل بازاسىندا ورنالاسقان k-Ster-I سۋاستى روبوت-ينسپەكتورى تەڭىز ءتۇبىنىڭ لاندشافتىن زەرتتەيدى, جارىلىس قاۋپى بار زاتتاردى تابادى جانە ولاردان العان دەرەكتەردى وپەراتورعا بەرەدى.
ميناعا قارسى قاشىقتىقتان باسقارىلاتىن k-Ster-س سۋ استى اپپاراتتارى 300 مەترگە دەيىنگى تەرەڭدىكتەگى سۋ استى مينالارىن جويۋعا ارنالعان. ولار تاسىمالداۋشى كەمەدەن ءبىر شاقىرىم قاشىقتىقتا جۇمىس ىستەي الادى.
جەردەگى جانە سۋ استىنداعى تاپسىرمالاردى ورىنداي وتىرىپ, ەڭ قيىن جەرلەردە, اسكەري روبوتتار جەكە قۇرام اراسىنداعى شىعىنداردىڭ الدىن الۋعا جانە بولىمشەلەردىڭ جاۋىنگەرلىك قابىلەتىن ارتتىرۋعا مۇمكىندىك بەرەدى.